Карупцыянеры толькi на паперы

Источник материала:

Работа над памылкамi

Карупцыя ў Беларусi адступае, але не здаецца ў палон да супрацоўнiкаў праваахоўных органаў. За 10 месяцаў гэтага года ў нашай краiне зарэгiстравана 2980 злачынстваў такога кшталту, што на 20 працэнтаў менш, чым летась.

Аднак гэтыя колькасныя паказчыкi не выклiкалi «галавакружэння ад поспехаў» у кiраўнiцтва рэспублiканскай Пракуратуры. Генеральны пракурор Пётр Мiклашэвiч падчас адкрыцця навукова-практычнай канферэнцыi, прысвечанай праблемам барацьбы з карупцыяй, неадназначна ахарактарызваў сёлетнюю «станоўчую статыстыку». Паводле яго слоў, з аднаго боку змяншэнне колькасцi карупцыйных злачынстваў з’яўляецца вынiкам ажыццяўляемых на дзяржаўным узроўнi мераў па выкараненню хабарнiцтва i казнакрадства. Разам з тым Пётр Мiклашэвiч прызнаў, што назiраецца знiжэнне актыўнасцi адмысловых аператыўных службаў па выяўленню падобных злачынстваў. Праўда, некаторыя барацьбiты з карупцыяй дэманструюць празмерную актыўнасць i замест таго, каб выводзiць на чыстую ваду сапраўдных хабарнiкаў i раскрадальнiкаў дзяржаўнай маёмасцi, мякка кажучы, крыўдзяць нi ў чым не вiнаватых людзей. I такiх карупцыянераў на паперы даволi шмат. За 9 месяцаў гэтага года следчымi пракуратуры спынена вытворчасць па 124 карупцыйных справах, што складае 17 працэнтаў ад агульнай колькасцi злачынстваў такога кшталту. Прычым 105 крымiнальных спраў былi спынены ў сувязi з адсутнасцю складу злачынства. Адметна, што большасць спыненых крымiнальных спраў — на сумленнi не толькi асобных супрацоўнiкаў праваахоўных органаў, якiя, карыстаючыся правам правядзення аператыўнага эксперыменту, фактычна арганiзуюць правакацыю хабару. Свой негатыўны ўзнос у «папяровую практыку» барацьбы з карупцыяй робяць i асобныя рэвiзоры. Iх памылковыя высновы адносна фiнансава-гаспадарчай дзейнасцi кiраўнiкоў прадпрыемстваў, арганiзацый цi ўстаноў нярэдка станавiлiся падставай для ўзбуджэння крымiнальных спраў. Дзеля таго, каб пазбегнуць падобных памылак надалей i не прыцягваць да крымiнальнай адказнасцi невiнаватых службовых асоб, ва ўпраўленнi па барацьбе з карупцыяй у дзяржорганах Пракуратуры краiны створаны спецыяльны аддзел фiнансава-эканамiчнага кантролю. Гэты аддзел укамплектаваны колiшнiмi спецыялiстамi Камiтэта дзяржаўнага кантролю i Мiнфiна. Менавiта на iх ускладзена задача рабiць кампетэнтныя высновы аб наяўнасцi цi адсутнасцi ўрону з боку службовых асоб. Толькi пасля заключэння памянёных спецыялiстаў следчы будзе прымаць рашэнне ўзбуджаць цi не крымiнальную справу па матэрыялах рэвiзiй i iншых праверак.

Пётр Мiклашэвiч паведамiў таксама, што ўстаноўлены выпадкi, калi некаторыя супрацоўнiкi праваахоўных органаў дзейнiчалi ў iнтарэсах канкурыруючых фiрмаў альбо кампанiй i, вядома ж, не без карысцi для сябе, займалiся зборам кампрамату на прадпрымальнiкаў, умешвалiся ў iх гаспадарчую дзейнасць, а падчас фактычна паралiзоўвалi работу суб’ектаў гаспадарання. Дзеля таго, каб падобная практыка больш не паўтаралася ,будзе ўзмоцнены пракурорскi нагляд за карупцыйнымi справамi.