Цi модна быць здаровым?

Источник материала:

Таццяна БАДЗЮКОВА, прарэктар Гродзенскага дзяржаўнага ўнiверсiтэта iмя Янкi Купалы:

— Лiчу, што трэба, як гэта робiцца шмат дзе ў свеце, забаранiць курэнне ў грамадскiх месцах, продаж алкагольных напояў паблiзу вакзалаў i школ.

Сёння вельмi актыўна развiваюцца iнфармацыйныя тэхналогii, аднак мала ўвагi надаецца фармiраванню Iнтэрнэт-сайтаў аб здаровым ладзе жыцця. Хоць гэта тэма магла б шырока папулярызавацца — на сайтах i навучальных устаноў, i ведамстваў, i розных арганiзацый.

Пажаданне айчыннай прамысловасцi — наладзiць выраб якаснага i даступнага па цане спартыўнага абсталявання, паколькi iмпартнае каштуе вельмi дорага.

Ганна ДУЛУБ, дырэктар Гродзенскай сярэдняй школы-лiцэя № 1:

— Прапаганда здаровага ладу жыцця... Хто б спрачаўся? Аднак спачатку трэба гэтаму абучыць у рамках школьнай праграмы, а з яе ўрокi здаровага ладу жыцця былi выключаны. Як прапагандаваць?

У нашай школе ёсць новы басейн, выдатная спартыўная зала. Аднак у цэлым, на жаль, у горадзе пераважаюць не спартыўныя, а камп’ютарныя залы. Мо, таму, хто адчыняе новую ўстанову камп’ютарных гульняў, трэба на мясцовым узроўнi паставiць умову нешта зрабiць i ў спартыўным, аздараўленчым накiрунку?

Вiктар ЛIСКОВIЧ, галоўны ўрач Гродзенскага абласнога радзiльнага дома:

— Сёння ў нашым радзiльным доме прымаецца 30 працэнтаў ад усiх родаў па вобласцi, а неўзабаве, дзякуючы канцэнтрацыi самага сучаснага медыцынскага абсталявання i высокапрафесiйных кадраў, гэта лiчба павялiчыцца да 45 працэнтаў. I гараджане, i вяскоўцы павiнны атрымлiваць дапамогу на раўназначна высокiм узроўнi. Пры гэтым мы, як перынатальны цэнтр, будзем наглядаць за мамай i дзiцем, пачынаючы ад планавання цяжарнасцi i на ўсiм яе працягу да з’яўлення на свет нованароджанага. У нашай структуры будуць медыка-генетычны цэнтр, абласная служба «Шлюб i сям’я», каб можна было атрымаць любую кансультацыю i дапамогу. Зробiм усё, што ад нас залежыць, каб дапамагчы людзям (сёння на 100 сем’яў — 25 бясплодныя) стаць бацькамi.

Мiкалай КЕНДЫШ, галоўны санiтарны ўрач Гродзенскай вобласцi:

— На маю думку, у праекце Нацыянальнай праграмы дэмаграфiчнай бяспекi трэба ўзмацнiць адказнасць самога чалавека за захаванне свайго здароўя. Не хапае спартыўных збудаванняў, iнвентару? Але ж, каб займацца фiзкультурай, шмат iнвентару не патрабуецца, было б жаданне. Аднак чамусьцi ў замежных студэнтаў, якiя вучацца ў Гродне, хапае жадання займацца i валейболам, i iншымi спартыўнымi гульнямi, а многiх нашых гэта абсалютна не цiкавiць. Вiдаць, выхаванне здаровага ладу жыцця трэба пачынаць з дзiцячага садка.