Контрнаступленне на крымiнал

Источник материала:

Мiнулы год стаў пераломным на фронце барацьбы са злачыннасцю. Як паведамiў Генеральны пракурор Пётр Мiклашэвiч, летась у нашай краiне было зарэгiстравана 191,4 тысячы злачынстваў, што на 2 працэнты менш, чым у 2005 годзе. Такога, хоць i нязначнага поспеху, паводле слоў кiраўнiка пракуратуры, удалося дасягнуць упершыню за апошнiя 5 гадоў. Адметна, што колькасць цяжкiх i асаблiва цяжкiх злачынстваў зменшылася на 11 працэнтаў.

Следчыя пракуратуры ў мiнулым годзе расследавалi больш за 4 тысячы крымiнальных спраў, у тым лiку 980 наўмысных забойстваў. Пераважную большасць такiх злачынстваў склалi «бытавыя разборкi» са смяротным зыходам. Аднак былi ў вытворчасцi следчых пракуратуры i крымiнальныя справы, здзейсненыя цэлымi злачыннымi арганiзацыямi: банда «Пажарнiкаў», «Рэчыцкая» i «Марозаўская» групоўкi. У апошняй справе кропкi над «i» да гэтага часу не расстаўлены, хоць ужо адбыўся суд над многiмi ўдзельнiкамi злачыннай арганiзацыi. Пётр Мiклашэвiч адзначыў, што ў адносiнах да яшчэ 6 «марозаўцаў», на рахунку якiх 7 забойстваў, працягваецца расследаванне асобнай крымiнальнай справы. Прычым адзiн з бандытаў — колiшнi супрацоўнiк праваахоўных органаў, якi знаходзiцца ў вышуку.

Яшчэ адну «гучную» крымiнальную справу завяршылi следчыя пракуратуры напрыканцы мiнулага года. Яна перададзена ў Вярхоўны суд i ў лютым павiнен пачацца працэс. На лаве падсудных апынецца былы мiлiцыянер, якi ў перыяд з 1992 па 2006 год здзейснiў на тэрыторыi Гродзенскай вобласцi 22 злачынствы. Колiшнi вартавы правапарадку абвiнавачваецца ў забойстве 12 чалавек, згвалтаваннi, хулiганстве, крадзяжах маёмасцi, незаконным захоўваннi выбуховых прылад, боепрыпасаў, зброi i псiхатропных рэчываў. Пётр Мiклашэвiч абяцаў, што пасля завяршэння судовага працэсу пракуратура зробiць «разбор палётаў», каб высветлiць ступень адказнасцi мясцовых кiраўнiкоў праваахоўных органаў, якiя не здолелi своечасова спынiць серыйнага забойцу.

Дарэчы, пасля суда над «Марозаўскай» групоўкай кiраўнiцтва рэспублiканскай пракуратуры правяло прынцыповую размову i з некаторымi сваiмi падначаленымi. Пракурор Гомеля, дзе на працягу многiх гадоў беспакарана дзейнiчалi бандыты, быў звольнены, больш за 10 супрацоўнiкаў мясцовай пракуратуры былi прыцягнуты да дысцыплiнарнай адказнасцi.