Мiхаiл ГЛIНСКI, старшыня Мiнскага райвыканкама: «Адбываюцца рэальныя перамены да лепшага»

Источник материала:

«ЗАМАЦАВАЛI СТАНОЎЧУЮ ТЭНДЭНЦЫЮ»

— Летась Мiнскi раён упэўнена спрацаваў па ўсiх накiрунках — былi выкананы ўсе асноўныя прагнозныя паказчыкi сацыяльна-эканамiчнага развiцця. Гэта датычыцца вытворчасцi спажывецкiх тавараў, аб’ёму платных паслуг насельнiцтву i г.д. Паспяхова справiлася з пастаўленай задачай прамысловасць. Летась мы ў чарговы раз пацвердзiлi тую станоўчую тэндэнцыю, якая адзначаецца ў раёне на працягу апошнiх некалькiх гадоў — штогод мы прыбаўляем, паляпшаем паказчыкi сацыяльна-эканамiчнага развiцця. Нягледзячы на складаныя ўмовы надвор’я, iншыя аб’ектыўныя фактары, iмкнёмся трымаць высокi ўзровень i гэта, на шчасце, удаецца.

— Па-мойму, Мiнскi раён — адзiн з нямногiх рэгiёнаў Беларусi, дзе летась удалося «плюсануць» у тым лiку i па валавому збору збожжа?

— Летась на палетках раёна ўдалося сабраць рэкордны ўраджай — больш чым 150 тысяч тон збожжа. Гэта на 7 тыс. тон перавышае ўзровень 2005 года. Зразумела, што паказчык мог быць значна вышэйшы, калi б не дрэннае надвор’е. Аднак i ў такiх умовах, як я лiчу, людзi зрабiлi ўсё магчымае. Нездарма ж на «Дажынках» у Бабруйску Мiнскi раён быў прадстаўлены сярод пераможцаў амаль ва ўсiх намiнацыях. Гэта цалкам заслужаная перамога.

Аграпрамысловы комплекс развiваецца досыць дынамiчна. Летась гаспадаркi сабралi ў 1,5 раза больш цукровых буракоў, чым ў 2005-м. Таксама ўпершыню за апошнi час быў нарыхтаваны 1,5-гадовы запас травянiстых кармоў. Валавая вытворчасць малака практычна дасягнула ўзроўню 100 тысяч тон, а сярэднi надой ад каровы па раёну склаў больш чым 5,7 тысячы лiтраў. Такiмi паказчыкамi сапраўды можна ганарыцца. Мы настроены рухацца далей, каб Мiнскi раён быў флагманам сельскагаспадарчай вытворчасцi не толькi Мiнскай вобласцi, а i ўсёй рэспублiкi. Закупляецца вялiкая колькасць самай найноўшай тэхнiкi i разнастайнага сельскагаспадарчага абсталявання i, такiм чынам, ствараюцца сучасныя ўмовы вытворчасцi.

«АГРАГАРАДКI — ГЭТА НАДЗВЫЧАЙ СУР’ЁЗНА»

— Мiхаiл Афанасьевiч, разам з мадэрнiзацыяй, стварэннем умоў вытворчасцi, напэўна, паралельна вырашаюцца i сацыяльныя пытаннi?

— Безумоўна, такая работа праводзiцца вельмi актыўна. Праграма адраджэння вёскi, якую мы паспяхова рэалiзуем, — даволi ўсебаковая, комплекс мерапрыемстваў скiраваны на вырашэнне разнастайных задач. У тым лiку i ў сацыяльнай сферы, каб стварыць у вёсцы спрыяльныя ўмовы для жыцця. За два апошнiя гады ў Мiнскiм раёне створаны 3 аграгарадкi, а ўсяго да 2010 г. iх плануецца ўвесцi 28. Вы можаце задаць зразумелае пытанне: а чаму ж так доўга «разварушваецеся»? Мы асэнсавана не фарсiравалi тэмпы, паколькi цудоўна разумелi, што аграгарадкi — гэта надзвычай сур’ёзна. Тут варта сапраўды стварыць умовы, рэальна параўнальныя з гарадскiмi. У нашым выпадку — нават са сталiцай. Такую работу нельга выканаць фармальна, паколькi па яе вынiках жыхары мяркуюць аб эфектыўнасцi ўлады. Разумееце, якая адказнасць! Таму на першых аграгарадках мы адпрацоўвалi эфектыўную сiстэму стварэння i далейшай дзейнасцi такiх населеных пунктаў. Зараз пацiху пачынаем «раскручвацца» — напрыклад, сёлета плануецца ўвесцi ўжо 6 аграгарадкоў.

— Сацыяльная iнфраструктура рэальна паляпшаецца?

— А як iнакш? Вельмi актыўна праводзiцца будаўнiцтва — летась у Мiнскiм раёне было здадзена ў эксплуатацыю больш чым 272 тысячы квадратных метраў жылля. Гэта зноў-такi рэкордны для нас паказчык. Разам з будаўнiцтвам новых аб’ектаў вялiкую ўвагу ўдзяляем лiквiдацыi даўгабудаў. Такую работу мы расцэньваем як адзiн з галоўных накiрункаў у плане навядзення парадку на зямлi. Ва ўсiх сельсаветах створаны альбо ўласныя камунгасы, альбо iншыя спецыялiзаваныя структуры, якiя забяспечаны неабходнай тэхнiкай. У раёне рэалiзуецца маштабная праграма дарожнага будаўнiцтва. Толькi за два апошнiя гады ў межах гэтага праекта было заасфальтавана больш чым 110 кiламетраў дарог.

«КАМУНАЛЬНIКI ПРАЦУЮЦЬ БЕЗ СТРАТ»

— Мiхаiл Афанасьевiч, а як развiваецца «камуналка»?

— Вялiкую ўвагу надаём навядзенню належнага парадку ў жылфондзе. Прадпрыемствы ЖКГ працуюць паспяхова, пацвярджэннем чаго з’яўляецца тое, што летась у нас гэтая галiна выйшла на бясстратную дзейнасць, пачала зарабляць на сябе грошы. У складзе жыллёва-камунальнай гаспадаркi створана ўласнае рамонтна-будаўнiчае аб’яднанне. Гэта дазволiла вырашыць некалькi пытанняў. Па-першае, аператыўна i якасна выконваць комплекс неабходных адпаведных работ, а таксама на 30 працэнтаў зменшыць iх кошт. Да таго ж падатковыя паступленнi ад такой дзейнасцi застаюцца ў раёне. Гэта яскравы прыклад сур’ёзнага, дзяржаўнага падыходу да справы.

Надзённая праблема — забеспячэнне насельнiцтва раёна якаснай пiтной вадой. У гэтым плане яшчэ некалькi гадоў таму было шмат нявырашанных пытанняў. Зараз яны паспяхова вырашаюцца — летась было ўведзена ў дзеянне 6 артэзiянскiх свiдравiн. Таксама i з iнжынерным абсталяваннем камунальнай iнфраструктуры. Наноў перакладзена больш чым 10 кiламетраў цеплатрас. Гэта рэальна дазваляе зменшыць страты цяпла. Два гады таму было заменена 2,7 кiламетра цеплатрас у пасёлку Гатава. Раней страты там дасягалi 25 працэнтаў, а пасля перакладкi зменшылiся да 1,5—3. Такiм чынам, паляпшаецца камфорт жыхароў i ўдаецца эканомiць стратэгiчныя энергарэсурсы. Напрыканцы мiнулага года ў раёне пачалося будаўнiцтва 5 мiнi-кацельняў. Неабходна крынiцы цяпла максiмальна наблiзiць да спажыўца. Укараняюцца сiстэмы пакватэрнага ацяплення. Работа, якую мы праводзiм у плане энергазберажэння, змяншэння страт у iнжынерных сетках, пераходу на мясцовыя вiды палiва, дазволiць у тым лiку мiнiмiзаваць урон у вынiку павелiчэння цаны на прыродны газ. Задача ўлады — зрабiць усё такiм чынам, каб насельнiцтва не адчула якiх-небудзь значных страт нi ў плане аплаты, нi ў плане камфорту.

«У СЯРЭДНIМ — БОЛЬШ ЧЫМ 300 ДОЛАРАЎ»

— Сэрвiс у раёне параўнальны са сталiчным?

— Адкажу так: узровень у раёне вельмi прыстойны. За апошнiя тры гады бюджэтныя паступленнi ў нас узраслi ўтрая: калi ў 2005-м яны складалi 7 мiльёнаў долараў у месяц, то зараз — больш чым 20 млн. Канешне, значная iх частка паступае ў рэспублiканскi бюджэт, але, тым не менш, у раёна з’явiлася больш магчымасцяў для перспектыўных укладанняў. Паводле папярэднiх даных, летась адлiчэннi на развiццё сацыяльнай сферы склалi 76—77 працэнтаў раённага бюджэту. За кошт такiх значных выдаткаў удалося шмат чаго зрабiць. Паспяхова ствараецца сучасная сiстэма адукацыi, медыцынскага абслугоўвання i г.д. У Сенiцы арганiзаваны лiцэй, якi рыхтуе абiтурыентаў для ВНУ аграпрамысловага, будаўнiчага профiлю, а таксама для ўнiверсiтэта культуры. Паспяхова працуе гiмназiя ў Бараўлянах. У раёне налiчваецца больш чым 30 лiцэйскiх класаў, дзе з вучнямi працуюць выкладчыкi вядучых вышэйшых навучальных устаноў Беларусi. Так што магчымасцi ў дзяцей для атрымання сучаснай адукацыi самыя шырокiя. Таксама i па медыцыне. Праводзiцца маштабная рэканструкцыя арганiзацый аховы здароўя, аснашчэнне iх найноўшай апаратурай. У шэрагу выпадкаў медыцынскiя ўстановы раёна працуюць па самых сучасных тэхналогiях. Нават жыхары сталiцы iмкнуцца сюды патрапiць на прыём. Якасць абслугоўвання значна палепшылася — за мiнулы год нараканняў на гэты конт з боку насельнiцтва раёна практычна не было.

— Наколькi прывабны Мiнскi раён па ўзроўню заробкаў?

— За мiнулы год сярэднi заробак у раёне склаў больш чым 300 долараў. Прычым сур’ёзнай «разбежкi» памiж рознымi галiнамi няма — гэта станоўчая тэндэнцыя. Таму па заробках, як я лiчу, умовы даволi прывабныя. Iх удалося стварыць, i маладыя спецыялiсты пасля заканчэння навучання ўжо вяртаюцца на работу ў раён. Таксама як i тыя работнiкi, што раней практычна збеглi ў сталiцу за «лепшым хлебам». Такая сiтуацыя — сведчанне таго, што ў раёне адбываюцца рэальныя перамены да лепшага.