У лясных угоддзях пачынаецца вакцынацыя ад шаленства

Источник материала:

Нагадаем, што напрыканцы мiнулага года было закуплена 235 тысяч дозаў вакцыны айчыннай вытворчасцi ад шаленства, аднак пэўны час з-за анамальна цёплага надвор’я яна знаходзiлася на захоўваннi на спецыяльных складах. Выкарыстоўваць яе пры плюсавых тэмпературах не мела сэнсу. Справа ў тым, што па тэхналогii вакцына ад шаленства ў вадкiм выглядзе ўпрыскваецца ў прынаду, якая пасля замарозкi раскiдваецца ў лясных угоддзях. Аднак пры плюсавой тэмпературы паветра, па-першае, сама прынада магла хутка сапсавацца i не прыцягнуць увагi драпежнiкаў, па-другое, паколькi доўгi час снегу не было, лясныя звяры без праблем здабывалi сабе харчаванне i маглi не спакусiцца на яе. З надыходам жа стабiльных мiнусавых тэмператур надышоў час дзейнiчаць.

— Мiнiстэрства сельскай гаспадаркi i харчавання прадаставiла нам даныя аб эпiза- атычнай сiтуацыi па шаленству за 2006 год па ўсiх абласцях як сярод хатняй жывёлы, так i дзiкiх звяроў (маюцца на ўвазе найперш непажаданыя вiды дзiкiх жывёл — воўк, лiса, янотападобны сабака): колькасць зафiксаваных выпадкаў, тэрыторыi, — паведамiлi журналiсту «Звязды» ў Мiнiстэрстве лясной гаспадаркi. — З улiкам гэтых звестак агульная колькасць дозаў вакцыны ад шаленства i была прапарцыянальна падзелена памiж абласцямi.

Так, у Брэсцкую вобласць будзе накiравана 14 тысяч дозаў вакцыны, у Вiцебскую — 42,5 тысячы, у Гомельскую — 28 тысяч, у Гродзенскую — 40 тысяч, у Мiнскую i Магiлёўскую вобласцi — адпаведна амаль 59 i 52 тысячы дозаў. Далей вакцына будзе размеркавана па канкрэтных карыстальнiках паляўнiчых угоддзяў з улiкам арандуемай плошчы i колькасцi зафiксаваных выпадкаў шаленства. Вакцыну атрымаюць абсалютна ўсе карыстальнiкi — i па лiнii Мiнлясгаса, i па лiнii Рэспублiканскага дзяржаўна-грамадскага аб’яднання «БТПР», i ўсе iншыя (уключаючы ў тым лiку i тэрыторыi ўсiх запаведнiкаў i заказнiкаў). Каб не было нiводнай «белай плямы».

— На працягу месяца пасля гэтага разам з падкормкай дзiкiх жывёл павiнна быць праведзена вакцынацыя ў лясных угоддзях, — дадалi нам у мiнiстэрстве. — Умовы гэтаму спрыяюць: мiнусавая тэмпература i адсутнасць натуральнага корму (тых жа мышэй) для драпежнiкаў.