Працоўныя буднi — свята для мiнiстра Навумава

Источник материала:

Мiлiцэйскi юбiлей

4 сакавiка айчынныя вартавыя правапарадку адзначаць сваё прафесiйнае свята.

Больш за тое, сёлета споўнiцца роўна 90 гадоў з моманту стварэння ў Мiнску першых атрадаў мiлiцыi, якiя ўзялi пад ахову важнейшыя дзяржаўныя ўстановы, пачалi патруляванне вулiц. З нагоды мiлiцэйскага юбiлею ўчора з журналiстамi сустрэўся мiнiстр унутраных спраў Беларусi Уладзiмiр Навумаў.

Кiраўнiк МУС падкрэслiў, што ў савецкiя часы беларускiя мiлiцыянеры атрымлiвалi за сваю службу больш хвалебных водгукаў, чым нараканняў. А па вынiках апошняга сацыялагiчнага апытання насельнiцтва Беларусi 76,5 працэнта рэспандэнтаў станоўча ацанiлi працу работнiкаў органаў унутраных спраў.

Дарэчы, беларуская мiлiцыя — самая старэйшая на постсавецкай прасторы. Хоць само слова «мiлiцыя», якое ў перакладзе з лацiнскай мовы азначае народнае апалчэнне, зараз захавалася не ва ўсiх былых рэспублiках СССР, многiя вярнулiся да больш дакладнай i прынятай ва ўсiм свеце назвы «палiцыя». У Беларусi, лiчыць Уладзiмiр Навумаў, рабiць гэта заўчасна. Паводле яго слоў, гэтае пытанне можна будзе абмяркоўваць гадоў праз трыццаць. «А ўвогуле, для мяне непрынцыпова, якая назва — «мiлiцыя» цi «палiцыя», — заявiў мiнiстр. Кiраўнiк МУС прызнаўся, што як i ўсе мiлiцыянеры не вельмi любiць святочныя днi. «Так ужо ўладкавана мiлiцэйскае жыццё, што святы — гэта дадатковая нагрузка. Я люблю буднi», — адзначыў Уладзiмiр Навумаў i паведамiў, што 4 сакавiка вылецiць у службовую камандзiроўку. Праўда, у якой краiне правядзе мiлiцэйскi юбiлей мiнiстр, пакуль што застаецца таямнiцай. Паводле яго слоў, ён накiруецца туды, «куды Радзiма загадае». Праўда, i святочныя мерапрыемствы з нагоды Дня беларускай мiлiцыi таксама будуць вельмi насычанымi працай для кiраўнiка МУС. Уладзiмiр Навумаў правядзе шэраг двухбаковых сустрэч з замежнымi калегамi. У прыватнасцi, мiнiстр плануе абмеркаваць са сваiмi замежнымi калегамi каля 20 сумесных мерапрыемстваў, накiраваных на перакрыццё каналаў пастаўкi наркотыкаў i гандлю людзьмi.

I яшчэ. Галоўны беларускi мiлiцыянер супакоiў сваiх падначаленых, схiльных да паўнаты. Ён абверг чуткi, што на службу ў органы ўнутраных спраў будуць адбiраць людзей толькi па пэўных параметрах росту i вагi. «Некаторым мiлiцыянерам падабаецца быць поўнымi, мы не супраць,» — заявiў мiнiстр. А вартавым правапарадку, якiя пажадаюць пахудзець, «ведамасная медыцына» акажа дапамогу.