«Усмешка на ўсе 32 i душа наросхрыст»

Источник материала:

Белдзяржунiверсiтэт — кузня таленавiтых, прыгожых, смелых, знаходлiвых хлопцаў — сапраўдных джэнтльменаў. У гэтым у чарговы раз пераканаў конкурс «Супермен-2007».

За тытул самага-самага змагалiся дзевяць студэнтаў. Кожны з iх адстойваў гонар свайго iнтэрната. Юным Гераклам давялося прайсцi тры няпростыя выпрабаваннi. Па-першае, раскрыць свой вобраз праз вобраз iншай асобы. Пры гэтым прадэманстраваць уласныя моцныя бакi характару i, як вынiк, пакарыць сэрцы журы i гледачоў. I ўсё гэта за некалькi хвiлiн.

Па-другое, праявiць сябе ў iнтэлектуальным конкурсе: героям трэба было прадоўжыць афарызмы знакамiтых людзей.

Пасродкам жа трэцяга i апошняга подзвiгу маладыя людзi ўнеслi ўласнае слова ў сучасную шоу-iндустрыю. Кожны з iх зрабiў пры дапамозе групы падтрымкi клiп.

У перапынках памiж конкурсамi артысты вядучай ВНУ краiны спявалi песнi, танцавалi, каб не толькi павесялiць гледачаў, але i даць канкурсантам час на падрыхтоўку, а журы — для падвядзення вынiкаў.

Перад журы ж стаяла, на мой погляд, складаная задача — выбраць самага мужнага, рамантычнага, разумнага, абаяльнага... Дарэчы, у склад «суддзяў» увайшлi жанчыны-кiраўнiкi шэрагу падраздзяленняў БДУ, Саша Варламаў, якi ўзначальвае Цэнтр сучаснага стылю i моды «Univеrsum Mоdеls» i беларуская спявачка Карыяна.

«Суп з сякеры» атрымаўся наварыстым

Карыяна павiнна была пайсцi на канцэрт Меладзе i «ВIА ГРЫ». Але аддала перавагу «Супермену».

— I нiколькi не шкадую, — зазначыла спявачка. — Хлопцы проста малайцы. Парадавалi. Дэфiлiравалi выдатна (Саша Варламаў прымаў удзел у падрыхтоўцы канкурсантаў. — Аўт.). У Заходнiх краiнах на такiя мерапрыемствы выдзяляецца шмат сродкаў. Для нашых жа студэнтаў «суп з сякеры» — звычайная з’ява. Але дзякуючы свайму таленту i знаходлiвасцi, беларусы, як правiла, выступаюць на высокiм узроўнi.

— Лёгка было вызначыць пераможцу?

— Не сказала б. У мяне было тры кандыдатуры. Вагалася. Нават не ведала, каму аддаць перавагу. Пры выстаўленнi балаў былi моманты, калi «дзесяткi» не хапала.

— Карыяна, якiмi якасцямi павiнен валодаць супермен, на ваш погляд?

— Для мяне супермен — гэта, перш за ўсё — Мужчына з вялiкай лiтары. Ён павiнен быць iнтэлiгентным, адукаваным, знаходлiвым, добрым, прыгожым...

— А як жа рамантыка?..

— Так, на першым месцы рамантычнасць. I толькi пасля прыгажосць.

— А наогул, цi патрэбна праводзiць падобныя мерапрыемствы, як вы лiчыце?

— Такiя конкурсы вельмi патрэбныя. Яны садзейнiчаюць самавыяўленню студэнтаў. I, бясспрэчна, гэта лепш, чым сядзець з бутэлькай пiва ў парку.

Супермен-»Малевiч» (Максiм увайшоў у вобраз знакамiтага сваiм «Чорным квадратам» мастака) i закаханы iм

— Я выпадкова трапiў на гэты конкурс. Павiнен быў удзельнiчаць iншы хлопец, але ў яго з’явiлiся праблемы з экзаменамi. Тады прапанавалi мне. Спачатку вагаўся, бо падрыхтоўка адымае шмат часу ад вучобы. Зараз рады, што згадзiўся. На сцэне я не ўпершыню. Яшчэ ў школе iграў на акардыёне, спяваў, але перамога ў гэтым конкурсе — самае буйное дасягненне ў маiм жыццi.

— Як склалiся адносiны з iншымi канкурсантамi?

— Пасябравалi на агульных рэпетыцыях. Памiж намi не было нездаровай канкурэнцыi. Спадзяюся, што i пасля конкурсу будзем падтрымлiваць сувязi.

— Максiм, перамога для цябе была нечаканасцю?

— Так. Насамрэч, я не думаў, што перамагу, бо амаль усе хлопцы былi старэйшымi i вышэйшымi за мяне.

— А як думаеш, тваё жыццё зменiцца пасля перамогi?

— Ну, пабуду «зоркай» тыдзень-другi (смяецца)... А калi сур’ёзна, то перамога ў гэтым конкурсе падарыла мне адну важную рэч — упэўненасць у сваiх сiлах. Думаю, што гэты падарунак дапаможа мне ў будучым пераадолець не адну перашкоду.

— Максiм, што ты пажадаеш «Супермену-2008»?

— Каб «Супермен-2008» быў яшчэ лепшы, чым я.

«Кожны мужчына крышку супермен, бо ўмее лётаць (ну хоць бы ў краму), валодае фiзiчнай моцай (як мiнiмум, сметнiца яму па плячах)...», — узгадала словы адной знаёмай феменiсткi (а як жа духоўнасць, чалавечнасць, дабрыня i знаходлiвасць? — пратэстую). Шкада, што яна не трапiла ў актавую залу лiцэя БДУ. Пераканана, канкурсанты б змянiлi яе ўяўленнi аб беларускiх суперменах...

Надзея ДРЫЛА. Фота аўтара.