Старшыня старшыню разумее...

Источник материала:

Старшыня Нёманскага сельскага Савета Янiна Майсюк на пасадзе ўжо васемнаццаты год. Былая настаўнiца, потым — намеснiк дырэктара школы, старшыня камiсii па справах непаўналетнiх... Зараз яна, здаецца, знайшла сваё месца. Дваццаць два населеныя пункты, у якiх, сярод iншых, жывуць 73 адзiнокiя чалавекi сталага ўзросту, праблемныя сем’i, асобы з асацыяльнымi паводзiнамi — i за ўсё гэта адказвае Янiна Майсюк. Кожны дзень яна сутыкаецца з надзённымi пытаннямi ў сваiх вёсках.

— Усе ведаюць, што ў сельскiм Савеце вырашаюцца праблемы па ўсiх напрамках —сацыяльнае абслугоўванне, ахова здароўя, выхаванне i адукацыя. Быць ва ўсiх «кропках» кожны дзень немагчыма, таму ў iх працуюць старасты, якiя з’яўляюцца надзейнымi маiмi памочнiкамi. Кiраваць тэрыторыяй можна, трэба толькi правiльна арганiзаваць людзей, — кажа яна, i дадае: — Не сакрэт, што фiнансаў у сельскiх Саветах бывае недастаткова, таму абапiраемся мы на супрацоўнiцтва з сельскiмi гаспадаркамi. Iх у нашай мясцовасцi тры.

Што могуць зрабiць кiраўнiкi СВК? Iх гаспадаркi забяспечваюць людзей транспартам для падвозкi дроў, дастаўляюць корм для жывёлы. У апошнi час з-за ўраганаў актуальнай стала праблема старых дрэў — у Нёманскiм сельсавеце трэба спiлаваць 156 такiх, i за гэта таксама адказваюць работнiкi сельгаспрадпрыемстваў.

I вырашэнне гэтых пытанняў залежыць ад чалавечага фактару — цi знойдуць агульную мову старшыня сельскага Савета з кiраўнiком гаспадаркi. Да таго ж людзi прызвычаiлiся, што сельскiя Саветы разглядаюць пытаннi, якiя часам выходзяць за рамкi iх паўнамоцтваў.

...Старшыня СВК «Наднёманскi» Мiхаiл Крукоўскi таксама не аддзяляе праблемы сельсаветаў i работнiкаў уласнага прадпрыемства. Ён лiчыць, што супрацоўнiцтва памiж мясцовай уладай i гаспадаркай павiнна прыносiць карысць абодвум бакам:

— У нас наладжана дзелавое i адначасова чалавечае паразуменне. Сёння ў сельскiх Саветах няма такiх магчымасцяў, як у прадстаўнiкоў вытворчай сферы, — у першую чаргу я маю на ўвазе наяўнасць фiнансавых сродкаў. Аднак трэба разумець, што мы робiм агульную справу, таму гаспадарка вырашае пытаннi, якiя звязаны з матэрыяльна-тэхнiчным забеспячэннем вяскоўцаў. А мясцовая ўлада дапамагае нам дакладна ўбачыць праблемы, якiя мы не заўважалi раней.

У тым лiку i ў сувязi са зваротамi грамадзян сродкi сельскагаспадарчага вытворчага кааператыва пайшлi на рэканструкцыю Дамоў культуры i лазнева-пральнага камбiната. Гаспадарка ўкладвае грошы i ў медыцынскае абслугоўванне. Хутка «Наднёманскi» распачне ўзвядзенне культурна-забаўляльнага цэнтра.

Трэба адзначыць, што пакуль не ўсе гаспадаркi могуць дазволiць сабе раскошу выдаткоўваць грошы на карысць вяскоўцаў. У гэтым сэнсе Нёманскаму сельсавету пашанцавала:

— Мы намагаемся рабiць усё, што ад нас залежыць, амаль без выключэння. Няма рознiцы, школа, арганiзацыя або толькi адзiн чалавек мае патрэбу, напрыклад, у набыццi спартыўнага iнвертару. Дарэчы, развiццю спорту ў мясцовасцi мы надаём асаблiвую ўвагу, i першыя вынiкi ўжо ёсць — валейбольная каманда перамагае на спаборнiцтвах.

Так i працуюць поруч Янiна Майсюк i Мiхаiл Крукоўскi. Дарэчы, як мы даведалiся пасля гутаркi, Нёманскi сельсавет i СВК «Наднёманскi» лiчацца аднымi з лепшых у Уздзенскiм раёне. «Сёння трэба зрабiць крыху больш, чым учора, а заўтра — крыху больш, чым сёння — гэтым прынцыпам мы i кіруемся ў сваёй дзейнасцi», — кажа Мiхаiл Крукоўскi.

Уздзенскi раён.