У палаючы хлеў адзiн за адным увайшлi тры чалавекi...

Источник материала:

Трагедыі

Паводле iнфармацыi Мiнскага абласнога ўпраўлення МНС, падзеi разгортвалiся наступным чынам. Пажар на падворку сям’i пенсiянераў пачаўся, хутчэй за ўсё, з-за iскры, што вылецела з трубы кормазапарнiка, якi стаяў ушчыльную да хлява. У драўлянай пабудове ўтрымлiвалiся парсючкi, карова, трусы. Менавiта гэтую жыўнасць кiнуўся ратаваць 72-гадовы пенсiянер. Аднак ужо праз некалькi хвiлiн ён перастаў адгукацца на крыкi людзей, што стаялi на падворку. Тады ўслед за мужам у хлеў пайшла гаспадыня. Аднак i жанчына не змагла выйсцi з пабудовы. За пенсiянерамi ў хлеў кiнуўся 20-гадовы сусед. Праз некалькi хвiлiн i ён перастаў адгукацца на крыкi. Iншыя суседзi, якiя сталi сведкамi трагiчных падзей, паспрабавалi зайсцi ў памяшканне, на парозе намацалi нечую руку i выцягнулi за яе, як аказалася, маладога чалавека. Тут падаспелi раней выклiканыя гаспадыняй падраздзяленнi МНС. Усiх траiх вынеслi на вулiцу, дзе пасля рэанiмацыйных мерапрыемстваў жанчына i хлопец апрытомнелi. На жаль, выратаваць 72-гадовага мужчыну не ўдалося, нягледзячы на ўсе намаганнi спецыялiстаў i мясцовых жыхароў. «Хуткая дапамога», якая прыбыла на месца здарэння, канстатавала смерць мужчыны. Суседа i бабулю даставiлi ў рэанiмацыю Слуцкага РТМА ў цяжкiм стане з дыягназам «атручэнне чадным газам».

На жаль, гэта не першы выпадак, калi, заходзячы ў палаючую пабудову, чалавек гiне. Таму спецыялiсты раяць кiравацца адной унiверсальнай парадай — адэкватна ацэньваць свае сiлы. Калi агонь ужо распаўсюдзiўся, не трэба вяртацца па каштоўныя рэчы i дакументы. Трэба памятаць, што пры пажары дым збiраецца ў верхняй частцы памяшкання, таму пры моцным задымленнi неабходна схiлiцца або легчы на падлогу, закрыўшы нос i рот мокрай насоўкай або рушнiком, i рухацца паўзком цi на карачках уздоўж сцяны, каб не згубiць накiрунак.