Глуха губляем час

Источник материала:

Як вынiкае са спецыяльнай заявы Дзяржаўнага мытнага камiтэта Беларусi, старшыня ДМК нашай краiны Аляксандр Шпiлеўскi падчас удзелу ў мiжнароднай канферэнцыi «Адно акно» — стварэнне спрыяльных умоў для гандлю» ў чарговы раз выступiў з «iнфармацыйнай iнiцыятывай». У прыватнасцi, беларускi бок прапанаваў Еўрапейскай камiсii, каб яна рэкамендавала нашым суседзям з ЕС заключыць з намi пагадненне аб абмене папярэдняй iнфармацыяй аб перамяшчаемых таварах i транспартных сродках. Кiраўнiцтвам ДМК Беларусi таксама была выказана гатоўнасць правесцi сустрэчу з калегамi для вызначэння шляхоў практычнай рэалiзацыi памянёнай iнiцыятывы. Аднак прапанова беларускага боку не была пачутая. У вынiку перавозчыкi па-ранейшаму зноў будуць губляць каштоўны час. Паводле звестак прэс-службы ДМК, зараз на афармленне i кантроль адной партыi тавару на гранiцы Беларусi з краiнамi Еўрасаюза ( Латвiяй, Лiтвой, Польшчай) затрачваецца ад 3 да 6 гадзiн. Калi б быў наладжаны папярэднi абмен iнфармацыяй, то памянёная працэдура скарацiлася б да 30 хвiлiн. Дарэчы, у паскарэннi працэдуры мытнага афармлення тавараў павiнны быць больш зацiкаўлены якраз iншаземцы. Бо летась з больш чым паўмiльёна транзiтных перамяшчэнняў груза праз тэрыторыю Беларусi 81,4 працэнта выкананы замежнымi перавозчыкамi.