Паперы — ёсць, бардзюра — няма

Источник материала:

Лiст у нумар

Майму мужу 80 гадоў, ён iнвалiд трэцяй групы i былы вязень. Ёсць у мяне i брат. Таксама iнвалiд, трэба i яго даглядаць. А тут на нашай вулiцы капiтальны рамонт зрабiлi, пасля якога ўся вада цячэ ў гарод. Як дождж, як вясна, так i стой з рыдлёўкай, капай канавы. А сiлы ж ужо не тыя...

«У курсе» нашай бяды ўсё начальства з ДКУП «Арыён» — i выконваючы абавязкi дырэктара, i сам дырэктар, i галоўны iнжынер... Узрадавалi нас, паведамiлi, што ў другiм квартале 2006 года каля дома «будет произведена установка бордюра». Ды толку — паперы ёсць, а бардзюра таго дагэтуль няма.

Муж 29 сакавiка паехаў на прадпрыемства, каб папытацца, калi будзе, чаму нiчога не зроблена. Не скажу — назаўтра камiсiю прыслалi. Мяне дома не было (брату лекi вазiла). Дык яны мужу сказалi, што нiчога не рабiлi i рабiць не будуць — грошай няма. Горш за тое, нас жа яшчэ i... аштрафуюць, калi не будзем уздоўж свайго плоту канаву капаць, адводзiць ваду ад дарогi.

Муж напалохаўся, узяў рыдлёўку. Пакуль я прыехала, накапаўся так, — ледзь жывы быў...

Вось якi ў нас тут парадак. Дакладней — нiякага.

Марыя Ягораўна АНТАНЕВIЧ,

г. Орша.