Аляксандр ЛУКАШЭНКА: «Добрасумленная праца на любым участку — галоўны рэсурс дзяржавы»

Источник материала:

Сярод тых, хто ўдастоiўся атрымаць данiну высокай павагi свайму прафесiяналiзму, адданасцi абранай справе з рук кiраўнiка нашай краіны, быў i Дзяржаўны сакратар Саюзнай дзяржавы Павел Барадзiн. Ордэн Дружбы народаў — гэта адзнака яго асабiстага ўкладу ў развiццё ўсебаковага супрацоўнiцтва памiж Рэспублiкай Беларусь i Расiйскай Федэрацыяй, намаганняў па ўмацаванню сяброўства двух братнiх народаў.

Звяртаючыся да прадстаўнiкоў беларускай навукi, педагогаў, Аляксандр Лукашэнка падкрэслiў, што менавiта навука павiнна стаць тым моцным iнтэлектуальным генератарам, якi выведзе народную гаспадарку на новы, высокаэфектыўны ўзровень.

Сярод узнагароджаных медалямi «За працоўныя заслугi» на гэты раз былi працаўнiкi i спецыялiсты паважаных у Беларусi працоўных калектываў: прадпрыемства «Атлант», Гомельскага завода «Электраапаратура», Вiцебскага i Барысаўскага мясакамбiнатаў, ААТ «Мiнскводбуд», РУП «Белгеадэзiя» i iнш.

— Добрасумленная высокапрадукцыйная праца на любым участку, у кожнай арганiзацыi — галоўны рэсурс краiны, надзейная апора нашай дзяржавы, — падкрэслiў беларускi лiдар. Аляксандр Лукашэнка шчыра падзякаваў iнiцыятыўным, таленавiтым кiраўнiкам, якiя сваёй энергiяй, арганiзатарскiм уменнем, клопатам аб людзях спрыяюць працвiтанню нашай маладой суверэннай краiны. Ён падзякаваў прадстаўнiкам усiх галiн народнай гаспадаркi за ўклад у дынамiчнае развiцце эканомiкi i падтрымку сацыяльна-палiтычнай стабiльнасцi нашай дзяржавы.

— Добрае дрэва пладамi, а чалавек — сваiмi справамi, — нагадаў Аляксандр Лукашэнка народную мудрасць.