Я не магу на вас забыцца

Источник материала:

Анталогiя беларускай песнi

Радзiма пачынаецца ад роднай хаты. I навакольныя краявiды ў пачуццёвым светаўспрыманнi робяцца для нас цэнтрам светабудовы. Адсюль разбягаюцца ва ўсе бакi нашы шляхi-дарогi. Таму мы прагна цягнемся душою да вытокаў — родных мясцiн.

Гэтыя настальгiчныя парываннi пяшчотна асвятляе песня «Я не магу на вас забыцца» Iгара Лучанка i Петруся Броўкi. У ёй словы раствараюцца ў музыцы i развiццё мелодыi пазначаецца паэтычнымi радкамi. Песня замiлавана гучала ў выкананнi «Песняроў» па ўсiм Саюзе i за яго межамi.

Мiхась ШАВЫРКIН.

Я НЕ МАГУ НА ВАС ЗАБЫЦЦА

Верш Петруся БРОЎКI

Музыка Iгара ЛУЧАНКА

Я не магу на вас забыцца,

Вы ўсё са мной, як нават сплю.

Вы мне скажыце, вы скажыце,

Чаму я гэтак вас люблю?

Бярозу тую — мнагаплачку,

Што ля бацькоўскага двара,

I тую рэчачку Вушачку,

Якой далёка да Дняпра...

I тую ўтульную мясцiнку,

Дзе мы пiлi кляновы сок,

I тую вузкую сцяжынку,

Што быццам жоўты паясок.

Я не магу на вас забыцца,

Вы ўсё са мной, як нават сплю.

Вы мне скажыце, вы скажыце,

Чаму я гэтак вас люблю?