Першы па фiзiцы

Источник материала:

Мiнскiя сувораўцы ўжо пяць разоў бралi ўдзел ва Усерасiйскай алiмпiядзе па фiзiцы i заўжды займалi прызавыя месцы. Сёлета з перамогай з Санкт-Пецярбурга вярнуўся адзiнаццацiкласнiк Павел Тарасевiч. За сваю вiкторыю ён атрымаў лiчбавую камеру. Юнак набраў 18 балаў з 27 магчымых i апярэдзiў сярэбранага прызёра з Расii на 7 балаў.

— У Санкт-Пецярбургу мне вельмi спадабалася, — узгадвае юнак родам з Оршы. — Мяне ўразiла Петрапаўлаўская крэпасць, Нява.

Сваiм поспехам Паша яшчэ раз пацвердзiў моцную школу па фiзiцы Мiнскага сувораўскага ваеннага вучылiшча, дзе выкладае заслужаны работнiк адукацыi Беларусi Леанiд Апанасавiч Грышчанка (у вучылiшчы ён працуе ўжо звыш 40 гадоў).

Iрына ПРЫМАК.

«БЕЛЫЯ РОСЫ» — ШАНЦ ПРАЯВIЦЬ СЯБЕ

У Беларусi з’явiлася i актыўна дзейнiчае новая некамерцыйная арганiзацыя па падтрымцы адоранай моладзi — Фонд спрыяння развiццю цырульнага мастацтва, дэкаратыўнай касметыкi i эстэтыкi «Працвітанне».

Ужо распрацавана праграма пошуку маладых талентаў з розных рэгiёнаў краiны. Першым крокам на гэтым шляху стане Мiжнародны фестываль прыгажосцi «Белыя росы», запланаваны на 20—23 верасня гэтага года. На iм будуць ацэньвацца цырульнае майстэрства, вiзаж, нэйл-дызайн. Лепшыя ўдзельнiкi атрымаюць магчымасць працягнуць прафесiйнае навучанне i павысiць квалiфiкацыю за кошт сродкаў Фонду, а таксама дапамогу ў працаўладкаваннi i права ўдзелу ў мiжнародных фестывалях i конкурсах. Не застануцца без увагi i маладыя людзi, якiя захапляюцца выяўленчым мастацтвам, фатаграфiяй i ды-джэiнгам. На Фестывалi «Белыя росы» сярод беларускiх канкурсантаў будзе праведзены адбор для ўдзелу ў Мiжнародных маладзёжных Дэльфiйскiх гульнях, якiя адбудуцца на Фiлiпiнах у лiстападзе 2007 года.

Iна АРЭХАВА.

ТАЛЕНТЫ ГЛЫБIНКI

У Бешанковiчах прайшоў конкурс «Таленты глыбiнкi», у арганiзацыi якога браў удзел райкам БРСМ. Мясцовыя маладыя таленты прадэманстравалi нумары мастацкай самадзейнасцi.

А ў вясковым Доме культуры ў Астроўне адбылося свята бардаўскай песнi. Добра, што i ў вёсцы ёсць свае барды, для якiх такi фестываль — магчымасць заявiць аб сабе, каб у далейшым атрымаць магчымасць выступаць i на iншых сцэнах.

Аляксандр ПУКШАНСКI.