Леанiд Козiк: «Было б глупствам страчваць грошы з-за надуманых матываў»

Источник материала:

У размове з карэспандэнтам «Звязды» старшыня Федэрацыi прафсаюзаў Беларусi Леанiд Козiк падкрэслiў, што фактычна больш за ўсiх пацерпяць працоўныя, таму што гэтыя заробленыя работадаўцам матэрыяльныя сродкi вярталiся ў выглядзе заработнай платы, стварэння новых рабочых месцаў, выплатаў па калектыўных дагаворах.

— Можна растлумачыць сiтуацыю проста. Уявiце, што беларускае прадпрыемства экспартуе тавар у Еўропу, па ўмоўнаму кошту за адну адзiнку ў 1000 рублёў. Пры гэтым, як прадстаўнiку краiны з пераходнай эканомiкай, яму панiжаюць мытную пошлiну на ўвоз або ўвогуле могуць яе адмянiць. Гэта i ёсць гандлёвая прэферэнцыя краiнам, якiя сталi на шлях развiцця. У выпадку пазбаўлення Беларусi льготных умоў на экспарт мы будзем вымушаны прадаваць тавар ужо за 1500 рублёў, пры тым што канкурэнты з замежных дзяржаў будуць i па-ранейшаму экспартаваць сваю прадукцыю па таму ж кошту ў адну тысячу, — тлумачыць Леанiд Козiк. — Як толькi мы даведалiся аб магчымай адмене прэферэнцый, то пачалi актыўна дзейнiчаць. Я вырашыў, што трэба зрабiць усё, каб сiтуацыя не развiвалася ў адмоўным для беларускiх працоўных накiрунку. Меры па пазбаўленню прэферэнцый могуць уступiць у сiлу ўжо летам гэтага года. Аднак канчатковага рашэння яшчэ няма.

Па ўласнай iнiцыятыве Леанiда Козiка Федэрацыя прафсаюзаў распрацавала i рэалiзавала шэраг мераў. Яна звярнулася да ўсiх прафсаюзных цэнтраў свету, у пасольствы еўрапейскiх дзяржаў у Беларусi i Расii, якiя працуюць з нашай краiнай. Усе прафсаюзы краiны, якiя ўваходзяць у Федэрацыю, падтрымалi i падпiсалi пiсьмы i звароты да замежных дзяржаў. У вынiку былi накiраваны тысячы пiсьмаў, тэлеграм, зваротаў, пасланняў па электроннай пошце. ?Пiсьмы ў пасольствы прыходзiлi мяхамi, паштальёны не паспявалi падвозiць iх, а прадстаўнiкi пасольстваў распiсвацца аб атрыманнi. За ўвесь час падрыхтоўчай работы мы накiравалi каля 100 000 пiсьмаў! — кажа Леанiд Козiк. — Аднак на гэтым наша дзейнасць не скончылася. Мы звязалiся i з кiраўнiкамi беларускiх прафсаюзных арганiзацый, якiя не ўваходзяць у Федэрацыю. Аднак нiводны з iх не падпiсаў наш зварот да прадстаўнiкоў замежных прафсаюзаў i дзяржаў. Я не саступiў i наладзiў сувязь з кiраўнiкамi прафсаюзных аб’яднанняў, якiя не ўваходзяць у беларускую федэрацыю, непасрэдна на прадпрыемствах. I вось ужо там, у пярвiчных арганiзацыях, мы знайшлi паразуменне».

У вынiку Федэрацыя прафсаюзаў Беларусi заручылася дапамогай дзесяткаў замежных краiн. I гэта можа прынесцi свае станоўчыя вынiкi. Справа ў тым, што сёння ў Жэневе пачынае работу сесiя Мiжнароднай арганiзацыi працы, на якой i будзе пастаўлена кропка ў пытаннi прэферэнцый для нашай краiны.

— На сесiю Мiжнароднай арганiзацыi працы прыязджаюць усе дзяржавы свету. З кожнай краiны накiроўваюцца прадстаўнiкi ўрада, наймальнiкаў i прафсаюзаў. Апошнiя фармiруюць так званую «Групу працоўных». Мы звярнулiся да дэлегатаў ад прафсаюзных арганiзацый свету з прапановай захаваць прэферэнцыi для нашай краiны, або адцягнуць iх адмену. Усе беларускiя працоўныя падтрымлiваюць нашы iнiцыятывы. Дзякуючы нашым зваротам i пiсьмам, у час работы сесii, калi будзе прымацца канчатковае рашэнне, нам абяцаюць дапамагчы дзесяткi прафсаюзных арганiзацый з замежных краiн, акрамя таго, свае подпiсы пад нашым зваротам iншыя ўдзельнiкi сесii паставяць непасрэдна ў Жэневе, — кажа Леанiд Козiк. — Таму будзем змагацца да апошняга. Было б глупствам страчваць з-за надуманых матываў вялiкiя матэрыяльныя сродкi.