Алiмпiйскiя гульнi сярод дзяцей? Гэта здорава!

Источник материала:

Пракаментаваць гэтую сенсацыйную навiну мы папрасiлi прэс-аташэ НАК Беларусi Пятра РАБУХIНА.

— Пётр Паўлавiч, такiя рашэннi проста так не прымаюцца. Што гэтаму папярэднiчала?

— Пытанне стварэння юнацкiх Алiмпiйскiх гульняў было паднятае ў далёкiм 1990 годзе Жакам Роге, якi ў той час узначальваў Асацыяцыю еўрапейскiх алiмпiйскiх камiтэтаў, абранага затым прэзiдэнтам МАК. Спадар Роге прапанаваў тады адзiн раз у два гады праводзiць летнiя i зiмнiя еўрапейскiя юнацкiя алiмпiйскiя днi моладзi, названыя пасля «Алiмпiйскiя фестывалi моладзi Еўропы». Забягаючы наперад, скажу, што гэты рух атрымаў моцнае развiццё. Пры iх правядзеннi выконваюцца ўсе атрыбуты дарослых алiмпiйскiх гульняў: выкананне гiмна, падняцце алiмпiйскага сцяга, урачыстае праходжанне спартсменаў краiн-удзельнiц, прынясенне спартсменамi клятвы весцi сумленную барацьбу i г.д.

— У якiх дысцыплiнах будуць спаборнiчаць маладыя спартсмены?

— У праграму Гульняў увойдуць усе вiды спорту зiмняй Алiмпiяды 2010 года i летняй 2012 года з абмежаванай колькасцю дысцыплiн i спаборнiцтваў. Будуць разглядацца i дысцыплiны, прапанаваныя спартыўнымi федэрацыямi, якiя не ўваходзяць у праграму Алiмпiйскiх гульняў, але праводзяцца сярод моладзi. Ужо вядома, што ўдзел у летнiх Гульнях прымуць 3200 маладых атлетаў, а ў зiмнiх — 1000.

— Якiя мэты пры правядзеннi юнiёрскiх Алiмпiйскiх гульняў ставiць перад сабой Мiжнародны алiмпiйскi камiтэт?

— Адначасова са спартыўнымi спаборнiцтвамi будзе весцiся адукацыйная праграма, якая расказвае аб алiмпiйскiх каштоўнасцях, аб карысцi спорту i здаровым ладзе жыцця, аб небяспецы прымянення допiнгу.

Не сумняваюся, што правядзенне такiх спаборнiцтваў паслужыць далейшым iмпульсам для развiцця дзiцячага i юнацкага спорту ва ўсiм свеце i ў кожнай краiне асобна. Гарадскiя, раённыя, абласныя спартакiяды вучняў агульнаадукацыйных школ будуць цяпер выяўляць новыя спартыўныя таленты, якiя затым стануць абараняць гонар сваёй краiны на юнацкiх Алiмпiйскiх гульнях.