Фосфарная хмара тармазнула

Источник материала:

Тэхнагенная катастрофа ў Львоўскай вобласцi, дзе 16 лiпеня сышлi з рэек i загарэлiся вагоны з жоўтым фосфарам, выклiкала перапалох i ў Беларусi. Масла ў агонь падлiлi ўкраiнскiя i расiйскiя СМI, якiя ўвечары 17 лiпеня паведамiлi, што падчас тушэння пажару атрутныя пары фосфару паднялiся ў паветра i рушылi ў бок Беларусi. Аднак, як паведамiла прэс-сакратар Мiнiстэрства прыроды i аховы навакольнага асяроддзя нашай краiны Алена Пенязь, рэальнай пагрозы насельнiцтву Беларусi няма. Паколькi руху паветраных мас падчас пажару практычна не было, то атрутная хмара асела на тэрыторыi Украiны, у радыусе 90 кiламетраў вакол месца катастрофы. Беларускiя эколагi праверылi стан навакольнага асяроддзя на прыгранiчнай з Украiнай тэрыторыi. У прыватнасцi, былi ўзяты пробы вады, грунту i атмасфернага паветра ў Брэсцкай i Гомельскай абласцях. Забруджвання не выяўлена. Тым не менш, як запэўнiлi ў Мiнпрыроды, спецыялiсты мiнiстэрства працуюць ва ўзмоцненым рэжыме. Паводле слоў Алены Пенязь, кантроль за станам паветраных мас, грунту i вады на прыгранiчных тэрыторыях ад Брэста да Пiнска праводзiцца праз кожныя тры гадзiны. Для гэтых мэтаў нават задзейнiчаны верталёт пагранiчных войскаў, з дапамогай якога робяцца пробы ў трох слаях атмасферы. Пакуль што ўсё i ў прамым, i ў пераносным сэнсе слова цiха: гэта значыць поўны штыль i адсутнасць атрутных рэчываў.

На момант падрыхтоўкi публiкацыi, Мiнпрыроды Беларусi атрымала ад украiнскiх калегаў паведамленне, што тэхнагенная катастрофа лакалiзавана на 90 працэнтаў. I ўсё ж у Мiнпрыроды нашай краiны на ўсякi выпадак не даюць адбой «паветранай трывогi». Нашыя спецыялiсты мадэлiруюць сiтуацыю, якая можа ўзнiкнуць пры ўзмацненнi ветру ў бок Беларусi i гатовыя прыняць неабходныя меры.

Належныя высновы з украiнскай катастрофы зрабiлi i беларускiя чыгуначнiкi. Паводле звестак прэс-службы Мiнiстэрства транспарту i камунiкацый, Беларускай чыгункай прымаюцца дадатковыя меры перасцярогi. Наладжаны яшчэ больш пiльны кантроль за вагонамi з жоўтым фосфарам i iншымi небяспечнымi грузамi, якiя перавозяцца па тэрыторыi нашай краiны. Увогуле, зараз вывучаецца пытанне аб змяненнi маршрутаў цягнiкоў з фосфарам. Плануецца накiраваць iх у абход буйных населеных пунктаў Беларусi.