Флiкер для пенсiянера

Источник материала:

Апоўднi пляшка. Ранкам... газета?

Насуперак ўсiм патрабаванням тэхнiкi бяспекi, трое даярак вырашылi пад’ехаць да фермы на трактарным прычэпе. Прычэп па ходу раптоўна «адышоў». Як вынiк, двое жанчын паспелi саскочыць убок. А трэцяя — апынулася пад коламi... Падобных прыкладаў можна прыводзiць шмат. Прынамсi, на першых месцах сярод усiх прычын заўчасных смерцяў былi i застаюцца дарожна-транспартныя здарэннi. I галоўную ролю тут адыгрывае не столькi няспраўная тэхнiка, колькi вядомы «чалавечы фактар».

Даволi красамоўныя лiчбы. За студзень—чэрвень толькi на тэрыторыi Мiнскай вобласцi адбылося 679 iнцыдэнтаў, у вынiку якiх 206 чалавек загiнулi, а яшчэ 663 — атрымалi раненнi. Аднак толькi ў якасцi канстатацыi: кожную дзесятую аварыю з цяжкiмi наступствамi здзейснiлi вадзiцелi, што знаходзiлiся ў нецвярозым стане. Прычым, нягледзячы на ўзмацненне адказнасцi, у параўнаннi з мiнулым колькасць такiх iнцыдэнтаў узрасла. У сувязi з гэтым, зазначыў начальнiк аддзела агiтацыi i прапаганды Мiнскага абласнога ўпраўлення ДАI Алег Цюрын, у рэгiёне пачынаюць выкарыстоўвацца новыя меры «прафiлактыкi» — друкаванне iмёнаў п’яных парушальнiкаў у мясцовых газетах.

Зрэшты, падобнае новаўвядзенне будзе не адзiным. Зводкi сведчаць, што наезды аўтамабiляў на пешаходаў у цёмны час сутак зусiм не сышлi ў мiнулае, гэтыя здарэннi працягваюць адзначацца лiтаральна кожны тыдзень. Таму, паведамiў Алег Цюрын, на тэрыторыi вобласцi рэалiзацыя святлоадбiвальных элементаў наладжана ў больш чым 1,5 тыс. гандлёвых пунктах. Апроч таго, уваходзiць у практыку «ўстаўкi» такiх элементаў у рабочае спецадзенне — яго вытворчасць асвоiлi ўжо некалькi прадпрыемстваў. Аднак гэта яшчэ не ўсё. Паводле слоў Алега Цюрына, зараз на Мiншчыне распачынаецца новая кампанiя па забеспячэнню пэўных катэгорый насельнiцтва бясплатнымi флiкерамi. У прыватнасцi, яны будуць выдавацца членам шматдзетных сем’яў, iнвалiдам i пенсiянерам з нiзкiм узроўнем даходаў.

Доўг ёсць. Машыны — ужо не

Не сакрэт, што адной з найбольш небяспечных галiн традыцыйна лiчыцца сельская гаспадарка. I ў тым лiку з прычыны пажараў. Ужо сёлета непасрэдна на палях вобласцi адбылося два па-сапраўднаму «гучныя» здарэннi — з-за парушэнняў правiлаў процiпажарнай бяспекi загарэлiся стары камбайн «Дон-1500», а таксама адносна новы, 2001 года вытворчасцi, КЗР-10. Прычым калi першая машына падлягае хоць бы частковаму аднаўленню, то другая была знiшчана цалкам.

— У вынiку iнцыдэнту з КЗР-10 прамы ўрон сельгаспрадпрыемства склаў 26 млн рублёў, — зауважае галоўны спецыялiст аддзела дзяржаўнага пажарнага нагляду Мiнскага абласнога ўпраўлення МНС Сяргей Габруковiч. — Да таго ж цi не самае сумнае: канчаткова разлiчыцца за камбайн гаспадарка так i не паспела. Атрымалася, што даўгi засталiся. А вось машыны —няма.

Не менш заўваг выклiкае стан сушылак. Сёлета пажарныя вобласцi выказалi прэтэнзii да стану 190 такiх установак. Прычым заўвагi наконт няспраўнасцi абсталявання, адсутнасцi процiпажарных разрываў i агароджанняў аказалiся зусiм не беспадстаўнымi. Без чалавечых i «тэхнiчных» страт тут абышлося. Аднак выпадак, калi на адной з сушылак цалкам згарэла 200 кiлаграмаў збожжа новага ўраджаю, ужо стаўся рэалiяй.

Лепшыя ўмовы — меншыя выдаткi

Мiж тым, у вобласцi распачынаецца кампанiя па сертыфiкацыi бяспекi на прадпрыемствах, работа якiх зарыентаваная на экспарт. Летась сертыфiкаты атрымалi 4 суб’екты гаспадарання. А сёлета, як чакаецца, iх будзе яшчэ 49 — i ў тым лiку гаворка iдзе аб Барысаўскiм i Нясвiжскiм заводах медыцынскiх прэпаратаў, жодзiнскiм прадпрыемстве «Свiтанак», салiгорскай «Купалiнцы», Мiнскiм скураным аб’яднаннi. Пры гэтым, як заўважыла падчас выязнога «круглага стала» намеснiк старшынi камiтэта па працы, занятасцi i сацыяльнай абароне Алена Кузьмiна, наяўнасць такiх сертыфiкатаў стане пацвярджэннем, што на прадпрыемствах дакладна ведаюць усе свае «слабыя месцы». I працуюць над тым, каб прадухiлiць магчымыя аварыi, а таксама няшчасныя выпадкi з работнiкамi.

Дарэчы, нялiшне заўважыць, што ва ўсiм свеце сертыфiкат бяспекi лiчыцца своеасаблiвай гарантыяй надзейнасцi партнёра. Праўда, апроч стварэння iмiджу, ёсць тут i iншая, больш канкрэтная мэта — скарацiць колькасць «шкодных» працоўных месцаў. Да 2010 года ў цэлым па рэгiёну яна павiнна зменшыцца больш чым на 20 працэнтаў.

Зразумела, што прадухiленне фактараў рызыкi — гэта найперш замена абсталявання. I, адпаведна, грошы. Разам з тым прадпрыемствы атрымлiваюць i пэўныя бонусы. Так, адзначае галоўны iнжынер ЗАТ «Маладзечнамэбля» Мiкалай Пiскуноў, у вынiку павялiчваецца вытворчасць працы, змяншаецца верагоднасць траўмаў i захворванняў, а таксама скарачаецца колькасць работнiкаў, занятых па «шкодных» Спiсах № 1 i № 2.

Прычым з цягам часу менавiта апошняя акалiчнасць павiнна прывесцi да прамой эканомii. Так, варта нагадаць: паводле праекта новага Закона «Аб прафесiйным пенсiйным страхаваннi», што ўжо прыняты парламентам у першым чытаннi, прадпрыемствы, дзе iснуе занятасць па Спiсах, будуць абавязаны плацiць на выплату датэрмiновых пенсiй сваiм работнiкам «лiшнiя» страхавыя ўзносы.