«Падчас водпуску мабiльны тэлефон не павiнен працаваць на прыём...»

Источник материала:

Якiх сучасных тэхналогiй асабiста вам не хапае сёння? Ад якiх тэхналогiй вы, магчыма, жадалi б пазбавiцца, хоць бы на нейкi час? Напрыклад, адключыць мабiльны тэлефон на час водпуску цi месяц не глядзець тэлевiзар...

Уладзiслаў ХIЛЬКЕВIЧ, каардынатар iнфармацыйнай дзейнасцi Праграмы развiцця ААН у Беларусi:

— Усё, што я хачу, я маю, бо ў нашым офiсе гэта заахвочваецца. Калi ты жадаеш мець нейкую тэхнiку, ты пiшаш заяву i не на заўтра, але праз некалькi месяцаў, як правiла, ты атрымлiваеш яе. Таму пытанне для мяне вельмi цяжкае. Як пытацца ў капрызлiвага дзiцяцi, якi мае шмат цацак, што яму набыць яшчэ на дзень нараджэння. Такое пытанне ўводзiць дзiця ў ступар... Мне асабiста, напэўна, не перашкодзiў бы ўласны lарtор. Хоць не ведаю, што б з дзвюма я сёння рабiў.

Што датычыцца другога пытання, то гэта на сто працэнтаў мабiльны тэлефон. Бо гэта пастаяннае матанне нерваў. I датычыцца не толькi водпуску, але i выхадных дзён, вечароў. Калi ты на нешта настроiўся, то гэта першы фактар, якi будзе цябе пастаянна тузаць. Таксама, магчыма, я атрымлiваю занадта шмат электронных пiсьмаў. Я не адмовiўся б ад iх наогул, але магутныя фiльтры паставiў бы.

Мiкалай ЛАЗАВIК, сакратар Цэнтральнай камiсii па выбарах i правядзенню рэспублiканскiх рэферэндумаў:

— Персанальны камп’ютар я маю толькi на працы. I ён мой добры, надзейны памочнiк у атрыманнi iнфармацыi, якая звязана непасрэдна з дзейнасцю Цэнтрвыбаркама i з абстаноўкай у свеце. Па крайняй меры аб выбарах у iншых дзяржавах я ў першую чаргу атрымлiваю звесткi праз Iнтэрнэт.

Ад чаго я хацеў бы пазбавiцца? Я добра адключаюся ад усёй непатрэбнай (i нават патрэбнай) iнфармацыi, калi iду ў водпуск. Я пасяляюся ў цешчы на дачы i амаль увесь час праводжу на прыродзе. Нават не гляджу тэлевiзар.

Мiкалай ДУБОВIК, намеснiк старшынi Камiсii па ахове здароўя, фiзiчнай культуры, справах сям’i i моладзi Палаты прадстаўнiкоў Нацыянальнага сходу:

— Пачну з другога пытання, бо мне прасцей на яго адказаць. У водпуску як нiколi разумееш, што наколькi добра мець мабiльную сувязь, настолькi гэта i дрэнна. Варта ўключыць тэлефон — дзень, лiчы, прапаў. I я лiчу, што падчас водпуску мабiльны тэлефон не павiнен працаваць на прыём. Бо калi ты хочаш адпачыць ад працы, то робiш няшмат тэлефанаванняў, а табе, як правiла, падчас водпуску наконт працы тэлефануюць яшчэ больш.

А на першае пытанне мне адказаць цяжка. Я падтрымлiваю сучасныя змены ў лепшы бок. I падтрымлiваю бесправадны Iнтэрнэт. Бо ў мяне дома сын шмат працуе ў Iнтэрнэце, адключае тэлефонную сувязь. Гэта стварае нязручнасцi. Нам не маглi дазванiцца, а мы часам не ведалi пра гэта. А бесправадная сувязь не перашкаджае iншым. Таму я за тое, каб такiя навiнкi атрымлiвалi развiццё. I карыстацца бесправадным Iнтэрнэтам павiнны мець магчымасць людзi не толькi ў аэрапорце, на вакзале, але i дома.

— А цi не жадаеце вы, як падарожнiк, мець GРS-навiгатар для арыентавання па электроннай карце?

— Сапраўды, у працяглых падарожжах без гэтай рэчы абысцiся дастаткова складана. Калi мы шлi на ўсюдыходах у экспедыцыi (Мiкалай Дубовiк пабываў не так даўно i ў Арктыцы, i ў Антарктыдзе. — Аўт.), мы цалкам арыентавалiся па GРS. Гэты прыбор найбольш дакладны, ён кампактны. Раней гэта рэч была сакрэтнай, яе мелi толькi ваенныя. А зараз любы чалавек яе можа мець. Таму гэтую рэч я хацеў бы мець. Хоць звычайна яна патрэбная для доўгiх падарожжаў. У звычайным жыццi можна абысцiся без яе.