Сэкс, мода i ланцугi Гiменея, альбо Чаго хочуць жанчыны?
Сэкс, мода i ланцугi Гiменея, альбо Чаго хочуць жанчыны?
Мужчынская тэрыторыя Кароценькiя спаднiчкi, глыбокiя дэкальтэ, аголеныя рукi i плечы — гэта ўсё сапраўдныя прыметы надыходу майскага цяпла. Устойлiвы тэмпературны рэжым "плюс ...-ццаць" значна пашырыў жаночы арсенал "зброi". Пры гэтым прама прапарцыянальна ўзраслi i патрабаваннi, якiя прыгожая палова прад’яўляе да свайго гардэроба. Мы можам цэлы дзень прысвяцiць шопiнгу, гадзiнамi круцiцца перад люстэркам, камбiнуючы памiж сабой элементы нашага ўбрання — ўсё дзеля адной мэты: спадабацца ЯМУ. Быць моднай, стыльнай, сэксуальнай — справа гонару любой паважаючай сябе жанчыны.Кажуць, што моду нельга прадказаць, аднак мы сёння паспрабуем даказаць адваротнае. Вядомы чытачам "Звязды" астролаг Уладзiмiр Васюк расказаў нашаму карэспандэнту пра найбольш актуальныя фасоны, стылi i каляровую гаму, якiя не проста ўпрыгожаць нас вясной-летам гэтага года, але i дапамогуць заваяваць мужчынскiя сэрцы. — На вясну прыпадае праходжанне планеты Венера па знаку Цялец, якi дыктуе неабходнасць ўвасаблення ў канкрэтных, адчувальных формах любовi, гармонii i прыгажосцi, — тлумачыць Уладзiмiр. — Веснавая энергетыка заўсёды непарыўна звязана з тэмай абнаўлення асабiстага жыцця, iмiджу. З пункту гледжання планет i зор, май — найлепшы перыяд для змен у знешнiм выглядзе i стылi, бо менавiта цяпер гэта атрымаецца зрабiць з мiнiмальнымi намаганнямi i ў адпаведнасцi з вашымi iдэаламi i памкненнямi. Распачатыя ў маi праграмы па змяненнi сябе, па ўпарадкаваннi ўзаемаадносiнаў з процiлеглым полам абавязкова прывядуць да значных станоўчых вынiкаў. Абавязковай умовай гармонii i поспеху ў асабiстым жыццi ў блiжэйшыя месяцы будзе сiстэматычная работа над сабой. Нават калi вы задаволены тым, што маеце сёння, не лянуйцеся нешта ўдасканалiць (у знешнасцi, адносiнах), раiць Уладзiмiр, iнакш рызыкуеце быць адкiнутымi назад. У маi актыўная жыццёвая пазiцыя будзе куды больш паспяховай, чым пасiўнае чаканне перамен. Актуальнай каляровай гамай будзе манахромнасць — спалучэнне чорнага i белага ў розных танальных варыяцыях. Лiнiя сiлуэта будзе дамiнаваць над колерам. Простая майка ў чорна-белую палоску з чорнай спаднiцай будзе больш прывабнай, чым стракатыя ўборы. У маi папулярнасць атрымае спалучэнне мяккiх адценняў зялёнага з чорным i белым. Пры гэтым зоркі раяць пазбягаць лiшнiх упрыгажэнняў i аксесуараў. Падыход да фармiравання свайго стылю, выбару паўсядзённага i святочнага адзення павiнен быць выключна функцыянальным. Вельмi актыўны рытм жыцця, адпачынку i кантактавання, характэрны для трэцяга веснавога месяца года, запатрабуе ўнiверсальных убораў, якiя падыдуць i для работы ў офiсе, i для вечарыны, i для начнога клуба. У гэты час у моду ўвойдуць прычоскi, простыя ў стварэннi. Доўгiя валасы будуць прыносiцца ў ахвяру кароткiм стрыжкам. Натуральны прыродны колер валасоў будзе пераважаць над "штучным". Асноўнымi тэндэнцыямi стылю паводзiнаў ўсяго 2008 года з’яўляюцца стрыманасць i кантроль над сабой. Павысiцца жаданне прытрымлiвацца здаровага ладу жыцця. Асаблiвую актуальнасць гэтая тэндэнцыя набудзе ў сярэдзiне лета, калi захапленне спортам i аздараўленне арганiзма стане масавым. Характэрнай рысай мая-чэрвеня 2008 года будзе лёгкасць у завязваннi новых кантактаў. Камунiкатыўныя здольнасцi большасцi людзей у гэты перыяд будуць на высокiм узроўнi, таму толькi надзвычай лянiвы чалавек у маi гэтага года не здолее знайсцi сабе пару, стварыць цi (калi ёсць патрэба) пашырыць кола зносiнаў. Жанчыны ў маi будуць лёгка iсцi на кантакт i... гэтак жа лёгка мяняць свае перавагi, густы i памкненнi. А мужчыны будуць шукаць не столькi прыгод, колькi сур’ёзных трывалых адносiнаў. Таму май стане райскiм часам як для адзiнокiх жанчын, якiя атрымаюць цудоўную магчымасць пашырыць "радыус" кантактавання i палепшыць сваё асабiстае жыццё, так i для халастых мужчын, якiя жадаюць знайсцi сваю "палавiнку", сваю АДЗIНУЮ. Галоўнае — не трэба ў гэты перыяд баяцца быць незразуметым: вашы пачуццi, выказаныя шчыра, хутчэй за ўсё, знойдуць водгук у душы аб’екта кахання. — У маi i летам 2008 года праявiць сябе адна яскрава выражаная тэндэнцыя сэксуальных паводзiнаў жанчын, — адзначыў астролаг. — Яны пажадаюць папоўнiць недахоп вопыту i адчуванняў у гэтай сферы. Хоць празмерна агрэсiўнымi ў сэксуальным плане яны не стануць, аднак свае патрэбы ў iнтымнай блiзкасцi будуць задавальняць з такой жа рэгулярнасцю, як патрэбы ў сне, харчаваннi i г.д. Падсвядома яны будуць шукаць партнёраў, якiя зарыентаваны на стабiльныя працяглыя адносiны. Чэрвень будзе перыядам рамантызму i перавагi яскравых i жыццярадасных тонаў, каляровых гам. Для таго, каб асабiстае жыццё складвалася гарманiчна, пастарайцеся "выпраменьваць" пазiтыў. Нават калi не ўсё складваецца так, як вам хацелася, i каханы чалавек паводзiць сябе не лепшым чынам, — знайдзiце адну-дзве прычыны прыўзняць свой настрой i стварыць сабе iмiдж лёгкага, кантактнага, здольнага хутка мяняцца чалавека. Асабiстыя адносiны, якiя могуць завязацца з 25 мая па 22 чэрвеня, павiнны прайсцi выпрабаваннi на трываласць часам. Большасць з iх можа хутка парушыцца з-за празмерна прынцыповай пазiцыi абодвух бакоў наконт недахопаў партнёра. У маi-чэрвенi значныя змены перажыве i мужчынская мода. Асноўнай задачай для прадстаўнiкоў моцнай паловы стане пошук "залатой сярэдзiны" памiж грамадскiмi стандартамi i непаўторным iндывiдуальным стылем. "Дзелавая" i "паўсядзённая" мода будзе вылучацца кансерватызмам i стрыманасцю а-ля "людзi ў чорным" (белая кашуля, чорны касцюм i нiякiх кiдкiх i дарагiх лiшкаў). Прастата i строгасць будуць вiтацца i ў выбары вячэрнiх убораў. Уменне "паднесцi" сябе будзе самым важным патрабаваннем да мужчын, дазволiць iм прыцягнуць увагу i "растапiць лёд" нават самых непрыступных жанчын. — Большасць прадстаўнiц прыгожага полу ў гэты перыяд не стане шукаць "мачо" цi "тоўсты пар- таманет", — адзначыў Уладзiмiр Васюк. — Iм будзе патрэбны добры суразмоўца, якi ўмее цанiць жанчыну такой, якая яна ёсць, i пры гэтым не хавае ўласных недахопаў i комплексаў. Ад самiх жанчын энергетыка планет запатрабуе ўмелага спалучэння стылю бiзнэс-ледзi i "кошкi, якая гуляе сама па сабе". Пажадана стварыць вобраз занятай мэтанакiраванай асобы, якая крыху стамiлася ад жыцця i сярод мноства падзей i перамен шукае простага i шчырага кантактавання. У чэрвенi можна будзе заваяваць мужчыну не столькi знешнасцю, колькi розумам, тонкiм разуменнем яго станоўчых якасцяў i недахопаў, а самае галоўнае — уменнем прызнаваць за сваiм абраннiкам права быць слабым i няздольным самастойна вырашаць праблемы. У чэрвенi i лiпенi энергетыка планет зменiцца, адпаведна з ёй — i модныя тэндэнцыi. На першы план выйдуць асаблiвасцi стылю, якiя будуць падкрэслiваць iндывiдуальнасць чалавека. Узрасце значэнне дэкаратыўнай касметыкi i парфумы. У адзеннi чорна-белая каляровая гама саступiць месца шэраму ў спалучэннi з салатавым, зялёным, цёплымi i няяркiмi адценнямi чырвонага. Дамiнаваць у гэты перыяд будуць спартыўны i свабодны стыль, без кiдкiх аксесуараў. Для таго, каб заваяваць прызнанне навакольных, трэба стварыць уражанне, што вы — чалавек, свабодны ад стэрэатыпаў i прадузятасцi, якi здольны самастойна вырашаць усе праблемы, лёгка перажывае i падарункi лёсу, i страты. Ад жанчын перыяд запатрабуе рэдкага спалучэння "кашачага" i "хатняга" стылю паводзiнаў. Калi патрэбна дабiцца ўвагi процiлеглага полу — варта перайсцi да актыўных дзеянняў. Нешта атрымаць у гэты перыяд можна толькi цаной мэтанакiраваных намаганняў. — Вось толькi "гульня" павiнна быць тонкай: прадастаўце мужчыну магчымасць заваяваць вас i тады ён з задавальненнем зробiць першы крок насустрач, — падкрэслiў астролаг. — Вялiкiм попытам будуць карыстацца жанчыны, якiя здолеюць спалучаць гонар, незалежны стыль паводзiнаў з уменнем быць ласкавай, адданай i вернай. На людзях можна трымаць сябе адасоблена, а сам-насам з каханым праяўляць клопат i пяшчоту. Жанчыны павiнны дакладна размяжоўваць асабiстае жыццё i работу. Службовыя раманы не знойдуць паразумення нi з боку калег, нi з боку кiраўнiцтва. У лiпенi-жнiўнi змены пацерпiць мужчынскi iмiдж. У гэты перыяд розум, логiка, уменне планаваць свае дзеяннi на некалькi крокаў наперад будуць вабiць жанчын куды больш, чым незалежнасць i ўпэўненасць у сабе. Сур’ёзнасць, грунтоўнасць ва ўсiх аспектах жыцця (i ў каханнi таксама), скiраванасць на будучыню стануць дамiнуючымi тэндэнцыямi. Асоба астролаг вылучыў узроставы дэмакратызм у модзе, якi будзе панаваць летам. Прычым лаяльнасць распаўсюдзiцца не толькi на аб’ёмы i вагу цела, але i на "справы сардэчныя". Павышаным попытам будуць карыстацца жанчыны бальзакаўскага ўзросту, многiя з якiх гэтым летам сустрэнуць новае каханне. — У цэлым, энергетыка 2008 года завяршае вялiкi цыкл развiцця моды, якi доўжыўся з 1997-га i завершыцца ў 2009-м, таму многiя тэндэнцыi i стылi зараз даволi размытыя, неакрэсленыя. Масавая свядомасць за 2008—2009 гады павiнна засвоiць папярэднi вопыт, што назапасiўся за 12 гадоў, каб у далейшым выпрацаваць новыя стылевыя адрозненнi, што будуць актуальныя ў наступны перыяд (2009—2022 гады). Неструктурыраванасць стылю i моды 2008 года, перавага манахромнай гамы i мноства стылявых адрозненняў, гарманiчнае ўспрыманне тэндэнцый апошнiх 12 гадоў якраз i з’яўляюцца адметнымi асаблiвасцямi пераходнай эпохi. Увогуле, планеты i зоркі нiколi не прымушаюць чалавека, не заганяюць яго ў межы, якiя немагчыма пераадолець. У кожнага з нас ёсць выбар — выкарыстаць астралагiчныя парады цi дасягаць пажаданага самастойна — значна большымi намаганнямi i затратамi. Iнга МIНДАЛЁВА.
Хто вы ў сэксе? Тэст 1. У каханнi найбольш важна: а) адзiнства душ, узаемаразуменне; б) моцная страсць — яна хвалюе i прыцягвае; в) поўнае злiццё з iншым чалавекам — тое, што не выказаць словамi; г) глыбокае пачуццё задавальнення (галоўным чынам у сэксуальным сэнсе). 2. Каханне з першага погляду — гэта: а) сумесь цягi i безразважнасцi, што не мае нiчога агульнага з сапраўдным пачуццём; б) iскра, без якой не можа прыйсцi сапраўднае каханне; в) толькi першы крок на шляху да больш сур’ёзнага пачуцця; г) сэксуальная прыхiльнасць, якая можа сустрэцца з падобным заклiкам у адказ i перарасцi ў пастаяннае пачуццё. 3. Сэкс з новым партнёрам — гэта: а) надзвычай эратычная прыгода, незалежна ад таго, хто побач; б) штосьцi цудоўнае, калi вы закаханы; в) тое, на што не так лёгка адважыцца; г) заўсёды невядомасць i рызыка. 4. Сэкс без кахання: а) гэтак жа добра (а часам i больш цiкава), як сэкс з пастаянным партнёрам; б) не выклiкае такiх эмоцый, як сэкс з любiмым чалавекам; в) апашляе адносiны; г) можа быць цудоўным, i тады следам за iм можа прыйсцi каханне. 5. Каб каханне з цягам часу не згасла: а) яно павiнна быць заснавана не толькi на сэксе, але i на агульнасцi iнтарэсаў, думак, заняткаў; б) у яго падмурку павiнна ляжаць моцнае пачуццё, усведамленне таго, што вас звёў лёс; в) патрэбна трывалая эмацыянальная сувязь; г) неабходна сэксуальнае задавальненне, вам разам павiнна быць добра. 6. Узбагачаць сэксуальнае жыццё навiзной: а) неабходна, каб сэкс не страцiў сваёй эратычнасцi; б) можна, але толькi калi вы натуральным чынам падышлi да гэтага, а не задалiся такой мэтай; в) неабавязкова, паколькi задавальненне ў сэксуальных адносiнах залежыць ад таго, што вы адчуваеце адно да аднаго, а не ад "тэхнiкi выканання"; г) пажадана, каб зразумець, што вам падабаецца, а што не, але гэта не надта iстотна. 7. Калi ў вас знiкла жаданне дзялiцца адно з адным тым, што на душы: а) вы адчуваеце горыч i пустэчу; б) адчуваеце сябе нiкому не патрэбным (-ай); в) не звяртаеце на гэта ўвагi: галоўнае не выказаць словамi; г) лiчыце, што гэта нармальна, толькi б у адносiнах не з’явiлася пачуцця варожасцi. 8. Вырашаць праблемы, якiя ўзнiкаюць памiж вамi, "шляхам перамоў": а) неабходна, толькi так iх i можна вырашыць; б) магчыма, аднак сама наяўнасць праблем гаворыць аб тым, што каханне сыходзiць; в) цяжка — размовы не кранаюць пачуццяў; г) не варта, паколькi гэта толькi выклiкае раздражненне. Каб памiрыцца, лепей моўчкi абняць любiмага чалавека або заняцца сэксам. 9. Сапраўдная блiзкасць — гэта: а) пастаянны абмен меркаваннямi, агульнасць думак; б) пастаянная праява кахання i вернасцi; в) непадробнае пачуццё; г) поўнае задавальненне ў iнтымным жыццi i адчуванне фiзiчнай блiзкасцi. Калi вы галоўным чынам выбiралi адказы варыянта А, значыць вы належыце да мастацкага тыпу. У сэксе такiя людзi аддаюць перавагу пераменам, разнастайнасцi, але ў цэлым не надаюць гэтаму баку жыцця асаблiвага значэння. Iм куды больш важна мець побач з сабой блiзкага чалавека, з якiм можна падзялiцца думкамi. Людзi гэтага тыпу давяраюць розуму больш, чым сэрцу. Рамантыкі выбiралi варыянт Б. Iх iдэал — яднанне сэрцаў, узаемнае пакланенне. Iм неабходна адчуваць асаблiвыя адносiны да сябе з боку свайго партнёра, яны прагнуць абажання i захаплення. Гэтыя людзi цэняць высокiя рамантычныя пачуццi. Калi iх няма, каханне для iх наўрад цi магчымае i сэкс тады нецiкавы. Аднак гэтым узвышаным натурам не падабаецца наладжаная размеранасць адносiнаў. Тыя, каго адносяць да эмацыянальнага тыпу, выбiралi ў адказах варыянт В. Паводле iх меркавання, самы незабыўны сэкс узнiкае на аснове эмацыянальнай сiмпатыi адно да аднаго, прычым часам гэтыя эмоцыi прыносяць боль, часам — радасць. Сэкс для iх адыгрывае важную ролю, але iм мала толькi фiзiчнага захаплення, неабходна поўнае злiццё. Глыбокае пачуццё ў такiх людзей здольна перарасцi ў сапраўдную манiю. Яны ва ўсiм кiруюцца эмоцыямi, а не розумам. Тыя, хто належыць да пачуццёвага тыпу, у адказах схiльныя выбiраць варыянт Г. Гэтым людзям патрэбны спакой i надзейнасць, таму добры сэкс для iх толькi "прадчуванне" трывалых доўгатэрмiновых адносiнаў. Яны не здольныя згубiць галаву i адназначна аддаюць перавагу спакойнай радасцi перад неўтаймоўнымi страсцямi. Сэкс для iх зводзiцца да чыста фiзiчнага кантакту. Калi ён добры, яны не будуць шукаць у сваiх адносiнах з партнёрам асаблiвай рамантычнай падставы або iмкнуцца да разнастайнасцi i навiзны. Падрыхтавала Святлана БАРЫСЕНКА.
Чтобы разместить новость на сайте или в блоге скопируйте код:
На вашем ресурсе это будет выглядеть так
Кароценькiя спаднiчкi, глыбокiя дэкальтэ, аголеныя рукi i плечы — гэта ўсё сапраўдныя прыметы надыходу майскага цяпла. Устойлiвы тэмпературны рэжым &q
|
|