Банда "бамбiла" катэджы

Источник материала:

На слыху

У Вiцебску затрымана крымiнальная група, якая на працягу некалькiх гадоў займалася крадзяжамi з элiтных катэджаў, дамоў, кватэр у абласным цэнтры, Вiцебскiм i Гарадоцкiм раёнах. Тры беспрацоўныя зладзеi прымянiлi цэлыя "тактычныя схемы" па маскiроўцы, знiшчэннi таго, што магло вывесцi на iх мiлiцыю.

Як паведамiў "Звяздзе" намеснiк начальнiка Упраўлення па барацьбе з арганiзаванай злачыннасцю па Вiцебскай вобласцi Юрый Шыянкоў, падазроныя ва ўчыненнi злачынстваў затрыманы пры збыце скрадзенага. А "пастаўлялi" яны розныя будаўнiчыя матэрыялы, бытавую тэхнiку праз знаёмых. Некаторыя рэчавыя доказы — будматэрыялы: шпалеры, ламiнаваныя падлогi ўжо выкарыстаныя тымi, хто рабiў рамонт. Зразалi нават газавыя катлы. Зладзеi падазраюцца ва ўчыненнi больш як 60 крадзяжоў. Зараз падлiчваюцца агульныя страты, прычыненыя iмi. Сярод канфiскаванага — нават батарэi, халадзiльнiк, газавая плiта. Адзiн з бандытаў сачыў, каб нiшто не перашкодзiла ўчыненню злачынства. Яго напарнiкi здымалi сучасныя шклопакеты з вокнаў i траплялi ўнутр памяшканняў. Грузiлi cкрадзенае на аўто i знiкалi з месца злачынства. Нiколi не "бамбiлi" катэджы, дзе, на iх думку, магла быць усталявана сiгналiзацыя. Потым выкiдвалi сваё адзенне, абутак, у якiя былi апранутыя падчас сваiх чорных спраў. Нават шыны здымалi з аўто, мянялi на новыя. А пачыналася ўсё ў лiстападзе 2006 года з крадзяжу звычайнай... цэглы. За сваю крымiнальную дзейнасць затрыманым свецiць ад 3 да 12 гадоў пазбаўлення волi.

Аляксандр ПУКШАНСКI.