Маладым медыкам дапамогуць

Источник материала:

У Мiнскай вобласцi маладым спецыялiстам-медыкам дапамогуць у вырашэннi жыллёвай праблемы: 21 чалавека плануюць забяспечыць службовым жыллём i 62 — месцамi ў iнтэрнатах. Аб гэтым паведамiў першы намеснiк начальнiка ўпраўлення аховы здароўя Мiнаблвыканкама Сяргей Ганчароў. Акрамя таго, усiм, хто пачынае сваю ўрачэбную кар’еру ў сельскай мясцовасцi, выплацяць аднаразовую матэрыяльную дапамогу з фонду падтрымкi маладых спецыялiстаў у памеры 10 базавых велiчынь.

Забеспячэнне жыллём — сур’ёзны аргумент для замацавання кадраў маладых медработнiкаў. Паводле даных на 1 студзеня 2008 года, на ўлiку тых, хто мае патрэбу ў паляпшэннi жыллёвых умоў, стаялi 108 урачоў i 297 сярэднiх медработнiкаў. Летась жыллё прадастаўлена 77 урачам i 102 прадстаўнiкам сярэдняга медыцынскага персаналу.

У лячэбна-прафiлактычных арганiзацыях вобласцi адчуваецца дэфiцыт вузкiх спецыялiстаў, адзначыў суразмоўца. Сёлета медустановам вобласцi патрабуецца 34 урачы-неўролагi, 38 рэнтгенолагаў, 39 хiрургаў, 66 акушэраў-гiнеколагаў, 17 оталарынголагаў, 24 афтальмолагi, 56 анестэзiёлагаў-рэанiматолагаў, 23 траўматолагi, 40 урачоў лабараторнай дыягностыкi.

"Летась былi вакантнымi 883 працоўныя месцы, а заяўка выканана ўсяго на 28,7 працэнта, — сказаў Сяргей Ганчароў. — Сёлета патрэбнасць у выпускнiках з вышэйшай медыцынскай адукацыяй дасягне 829 чалавек. Па ацэнцы, гэтыя вакансii будуць запоўнены толькi на 30—35 працэнтаў". На 1 студзеня 2008 года ў сiстэме аховы здароўя Мiнскай вобласцi працавалi 34 тыс. 789 чалавек, у тым лiку 4 тыс. 862 урачы i 15 тыс. 459 сярэднiх медработнiкаў. Прычым амаль 17 працэнтаў урачоў i 9 працэнтаў сярэдняга медперсаналу — пенсiянеры.

Ала ШАРКО, БЕЛТА.