"Буду ездзiць па Кругламу на чырвоным "Ферары"!" — упэўнены круглянскi прадпрыма
"Буду ездзiць па Кругламу на чырвоным "Ферары"!" — упэўнены круглянскi прадпрымальнiк Уладзiмiр Тартынскi
Месцічы Цэнтр Круглянскага раёна развiваецца намаганнямi ўлады i прыватнай iнiцыятывы.— У нас будуць тры асноўныя новыя прадпрыемствы: па вытворчасцi керамiчнай цэглы, тратуарнай плiткi i перапрацоўкi драўнiны, — паведамiў старшыня Круглянскага райвыканкама Дзмiтрый Гобараў. — На iх атрымаюць працу больш за дзве сотнi чалавек. Керамiчная цэгла Лiтаральна днямi ў Магiлёве адбыўся аўкцыён: недабудаваны будынак iльнозавода ў Круглым прададзены за 97 мiльёнаў рублёў з правам арэнды на 99 гадоў. Грошы заплацiлi будучыя iнвестары. Зарослыя зелянiнай руiны яны плануюць пераўтварыць у паспяховы цагляны завод пад назвай "Усходнi". Гэта цяпер самы важны i самы сур’ёзны аб’ект на Кругляншчыне. Калiсьцi ў райцэнтры вырашылi пашырыць iльнозавод, але будаўнiцтва было спынена яшчэ ў 1989 годзе. Недабуд стаяў нiкому не патрэбны, аднак з прыняццем Дзяржаўнай праграмы развiцця малых i сярэднiх паселiшчаў узнiкла iдэя стварыць тут цагляны завод. Раённая ўлада стала шукаць iнвестараў i рабiць iм выгадныя прапановы. Па-першае, у Круглянскiм i суседнiх раёнах ёсць добрыя залежы глiны, неабходныя для вытворчасцi. Паводле папярэдняй разведкi, глiны ў самiм раёне хопiць як мiнiмум на 5 гадоў паўнавартаснай працы прадпрыемства. Па-другое, пад цагляны завод iдэальна пасуе недабуд. Вытворчая лiнiя керамiчнай цэглы мае працягласць у 120 метраў, i памеры будынка былога льнозавода адпавядаюць iдэi. Па-трэцяе, мясцовая ўлада падтрымлiвае праект. Яна зацiкаўленая, каб нерухомасць плошчай у 16 тысяч квадратных метраў выкарыстоўвалася, а не стаяла занядбаная. Каб былi створаны 100 новых працоўных месцаў. I, безумоўна, райвыканкам разлiчвае на дадатковыя паступленнi ў мясцовую скарбонку. — Мы падпiсалi пратакол аб сумесных намерах з польскiмi iнвестарамi, — расказаў Дзмiтрый Гобараў. — Яны маюць намер наладзiць вытворчасць цэглы. Кошт гэтага праекта ацэньваецца ў 17 мiльёнаў долараў. Сур’ёзная справа: плануецца выраб 30 мiльёнаў штук цэглы ў год. Што датычыцца грошай для бюджэту, то пакуль у Круглым не называюць лiчбу — баяцца сурочыць, бо праект яшчэ толькi стартуе. Аднак мяркуецца, што цагельня з цягам часу стане самым буйным падаткаплацельшчыкам у раёне. Цяпер тут лiдзiруе будаўнiчая арганiзацыя, якая плацiць у год у мясцовы бюджэт 3 мiльярды рублёў. У райвыканкаме разлiчваюць, што паступленнi ад новага прадпрыемства ў будучым павiнны "перакрыць" гэтую суму. — Наш завод патрэбен не толькi Кругламу, але i ўсёй Магiлёўскай вобласцi, — адзначыў дырэктар цаглянага завода "Ўсходнi" Андрэй Цiшуроў. — Сёння на цэглу вялiкi попыт. А на нашым прадпрыемстве яна яшчэ будзе i высокатрывалая. У краiне будаўнiчы бум, i ўсiм будзе патрэбна наша прадукцыя. Плануем, што да 2010 года завод запрацуе! Тратуарная плiтка У Круглым развiваюцца i мясцовыя праекты. Не самыя буйныя, але з перспектывамi. Прадпрыемствы па перапрацоўцы драўнiны i па вытворчасцi тратуарнай плiткi ўжо паспяхова працуюць. Уладзiмiр Тартынскi родам з Кругляшчыны. Ён жыў i працаваў у Мiнску, але захаваў сувязь з роднымi мясцiнамi. Прадпрымальнiк займаўся прыватнымi аўтаперавозкамi ў сталiцы, а пяць гадоў таму вырашыўся i арганiзаваў у Круглым цырульню, якая карыстаецца папулярнасцю ў жыхароў райцэнтра. I Тартынскаму неўзабаве прапанавалi новы праект. За адну базавую велiчыню яму перадалi старую кацельню, якая не выкарыстоўвалася. Уладзiмiр прадаў у Мiнску кватэру, узяў крэдыт пад адкрыццё новых працоўных месцаў i ўсе грошы выдаткаваў на вытворчасць тратуарнай плiткi. А сёння з гордасцю гаворыць, што яго першая прадукцыя пайшла для добраўпарадкавання помнiка ахвярам вайны. Кажуць, што заказы на тратуарную плiтку, у тым лiку i ад прыватных асобаў, паступiлi ўжо на некалькi месяцаў наперад. — Крыўдна кiнуць сталiцу? — засмяяўся пытанню Уладзiмiр. — I вам рэкамендую паступiць гэтак жа. Тут цудоўная прырода, выдатны сырадой, рыбалка, свежае паветра. А ў сталiцу да сяброў прыязджаю, а вось жыць там не цягне. Я тут хату дзеда аднаўляю. Мая справа — цяпер тут, у райцэнтры: прыватнае ўнiтарнае прадпрыемства "Тартынскi". Гаспадар зусiм не выглядае як начальнiк: гаворыць, што разам з рабочымi пачынаў з лома i рыдлёўкi, а цяпер сам становiцца ля станкоў i працуе ў невялiкiм цэху. — У мяне тут добры калектыў склаўся — 8 чалавек, у якiх сапраўды залатыя рукi, — хвалiцца Тартынскi. — Нават удалося некалькi чалавек вярнуць з расiйскiх заробкаў. Людзi вераць у перспектыву. I я таксама веру... што яшчэ буду ездзiць па Кругламу на чырвоным "Ферары"! * * * А калi сур’ёзна, то прадпрымальнiк растлумачыў: цяпер у Мiнску складана заняць вольную ячэйку ў бiзнэсе з не самым вялiкiм стартавым капiталам. — А ў правiнцыi нашмат лягчэй, — прызнаецца Тартынскi. — Тут цяпер магчымасцяў больш, i ўлады дапамагаюць. — Так, са свайго боку мы робiм усё, каб прыцягнуць iнвестараў, — запэўнiвае Дзмiтрый Гобараў. — Каб яны сапраўды захацелi выдаткаваць грошы ў наш раён. Зносiны з прыватнiкамi ў нас складваюцца нармалёвыя. I мы ўсiх запрашаем прыязджаць да нас. Для iнвестараў — зялёнае святло! З дапамогай Дзяржаўнай праграмы развiцця малых гарадоў у Круглым разлiчваюць стварыць больш за 500 новых працоўных месцаў. Iлона Iванова. Круглянскi раён.
Чтобы разместить новость на сайте или в блоге скопируйте код:
На вашем ресурсе это будет выглядеть так
— У нас будуць тры асноўныя новыя прадпрыемствы: па вытворчасцi керамiчнай цэглы, тратуарнай плiткi i перапрацоўкi драўнiны, — паведамiў старшыня Круг
|
|