Мытнай інфраструктуры Саюзнай дзяржавы — еўрапейскi ўзровень

Источник материала:

23 чэрвеня ў Гродне адбылося сумеснае пасяджэнне пастаянных камiсiй Парламенцкага Сходу Саюза Беларусi i Расii. Парламентарыi ўзялi ўдзел у цырымонii ўскладання кветак да помнiка загiнулым воiнам у парку iмя Жылiбера, сустрэлiся з кiраўнiцтвам Гродзенскай вобласцi, а затым азнаёмiлiся з работай пагранiчнага пункта пропуску "Брузгi" i абмеркавалi пытанне аб ходзе рэалiзацыi саюзных праграм па ўдасканаленнi мытнай iнфраструктуры i ўладкаваннi знешняй мяжы Саюзнай дзяржавы.

Дэпутаты адобрылi вынiкi работы мытных i пагранiчных службаў Беларусi i Расii па рэалiзацыi Праграмы першачарговага развiцця мытнай iнфраструктуры пагранiчных пунктаў пропуску на тэрыторыi Рэспублiкi Беларусь на перыяд 2002—2007 гадоў. Згодна з ёй, рэканструяваны восем пунктаў пропуску, якiя цяпер цалкам адпавядаюць мiжнародным нормам, аснашчаны самымi сучаснымi iнфармацыйнымi тэхналогiямi, што дало магчымасць павялiчыць iх прапускную здольнасць i iстотна скарацiць час мытнага афармлення, забяспечыць камфортныя ўмовы для ўдзельнiкаў знешнеэканамiчнай дзейнасцi i грамадзян пры перасячэннi беларускага ўчастка знешняй мяжы Саюзнай дзяржавы.

Саюзныя парламентарыi падтрымалi iнiцыятыву Дзяржаўнага мытнага камiтэта Беларусi аб падрыхтоўцы i ўзгадненнi сёлета прапаноў аб распрацоўцы новай праграмы Саюзнай дзяржавы па развiццi мытнай iнфраструктуры. Мытнаму камiтэту Саюзнай дзяржавы рэкамендавана ў 2008—2009 гадах ажыццявiць практычныя мерапрыемствы па падрыхтоўцы пераносу мытнага кантролю на знешнюю мяжу Саюзнай дзяржавы.

Дэпутаты таксама разгледзелi праект новай рэдакцыi Парадку распрацоўкi i рэалiзацыi праграм Саюзнай дзяржавы. Шэраг актуальных пытанняў быў разгледжаны i на пасяджэннях шасцi камiсiй Парламенцкага Сходу. У прыватнасцi, члены камiсii па эканамiчнай палiтыцы абмеркавалi пытаннi аб ходзе рэалiзацыi саюзнай праграмы па развiццi дызельнага аўтамабiлебудавання, аб праекце праграмы па развiццi станкабудавання, а таксама аб узаемаадносiнах Беларусi i Расii ў галiне мiжнародных аўтамабiльных перавозак.

Барыс ПРАКОПЧЫК.