Засталося ўзяць рэванш

Источник материала:

Засталося ўзяць рэванш

Вакол Еўра

У пятніцу, суботу i нядзелю на чэмпiянаце Еўропы па футболе адбылiся тры чвэрцьфiнальныя матчы. Турцыя i Харватыя ў асноўны i дадатковы час згулялi ўнiчыю (1:1) i высвятлялi паўфiналiста ў серыi пенальцi. Удача аказалася на баку Турцыi (3:1). У матчы Нiдэрланды — Расiя мацнейшы вызначыўся ў дадатковы час — падапечныя Гуса Хiдынка адправiлi "аранжавых" дадому. Здаецца, галоўнай сенсацыяй Еўра-2008 становiцца зборная Расii. Пасля разгромнага паражэння ад iспанцаў (1:4) на старце турнiру многiя i не спадзявалiся, што расiяне атрымаюць хоць бы адну перамогу. Але пасля таго пройгрышу падапечныя Гуса Хiдынка нечакана змянiлiся i сталi зусiм iншым калектывам у наступных сустрэчах з грэкамi i шведамi. Толькi ярыя аптымiсты верылi, што расiянам у чвэрцьфiнале ўдасца прайсцi падапечных Марка ван Бастэна. Але Гус Хiдынк зрабiў немагчымае i вывеў сваю каманду ў паўфiнал кантынентальнага першынства. Раней нiводнаму спецыялiсту, якi працаваў з расiйскiмi футбалiстамi, дасягнуць такiх вышынь не ўдавалася. А 22 чэрвеня стаў вядомы сапернiк зборнай Расii па паўфiнале. Iм стала каманда Iспанii, якая перамагла чэмпiёнаў свету iтальянцаў у серыi пенальцi (0:0, пен. 4:2). 26 чэрвеня у Расii ёсць магчымасць узяць рэванш.

Памочнiк Хiдынка пастрыгся

Асiстэнт Гуса Хiдынка ў трэнерскiм штабе зборнай Расii Аляксандр Барадзюк значна ўкарацiў сваю прычоску. Тым самым ён выканаў абяцанне, якое раней даў iгракам: развiтацца з валасамi ў вынiку выхаду зборнай у паўфiнал Еўра-2008. Барадзюк пастрыгся 22 чэрвеня. У камандзе ўчынак трэнера ўспрынялi з захапленнем.

Пабiлiся фанаты Турцыi i Харватыi

У швейцарскiм Базэлi палiцыя арыштавала 50 фанатаў зборнай Галандыi. Расстроеныя паражэннем сваёй каманды, балельшчыкi iмкнулiся справакаваць бойкi з расiйскiмi турыстамi, а таксама са швейцарцамi i нават учынялi патасоўкi памiж сабой. А ў фан-зоне, абсталяванай у сталiцы Аўстрыi для прагляду матча 1/4 фiналу Харватыя — Турцыя (1:3 па пенальцi), адбылася бойка. Турэцкiя балельшчыкi ўчынiлi патасоўку адразу пасля гола свайго форварда Семiха Шанцюрка, якi зраўняў лiк на другой дабаўленай хвiлiне да дадатковага часу матча, спынiлi стычку на час пасляматчавых пенальцi — i працягнулi пасля матча.

Варатар зборнай Турцыi згуляе за нападаючага

Капiтан зборнай Турцыi нападаючы Нiхат Кахвечы прапусцiць астатнiя матчы Еўра-2008 з-за траўмы правага сцягна. Нiхат атрымаў пашкоджанне на апошнiх хвiлiнах дадатковага часу чвэрцьфiнальнага матча з Харватыяй, i медыцынскае абследаванне паказала, што траўма сур’ёзная. 28-гадовы футбалiст адыграў важную ролю ў выхадзе Турцыi ў плей-оф турнiру. На апошнiх хвiлiнах матча трэцяга тура групавога этапа з Чэхiяй форвард забiў два мячы i прынёс сваёй камандзе перамогу. Цяпер у распараджэннi галоўнага трэнера зборнай Турцыi Фацiха Церыма засталося толькi 13 палявых iгракоў i два варатары, хоць у заяўцы на турнiр значыцца 23 чалавекi. Варатар Валкан Дэмiрэль, абаронца Эмрэ Асiк, паўабаронцы Арда Туран i Тунжай Санлi прапусцяць гульню з Германiяй з-за дысквалiфiкацыi. Абаронцы Эмрэ Гюнгор i Сервiт Чэцiн, а таксама паўабаронца Тумер Мецiн траўмаваныя. У гэтай сiтуацыi Церым заявiў нават аб тым, што запасны варатар Толга Зенгiн можа ўзяць удзел у матчы ў якасцi палявога iграка — выйсцi на замену i згуляць на пазiцыi апошняга абаронцы цi цэнтрфорварда.