Абзац

* На рацэ Сава ў Славенii перавярнулiся дзве байдаркi. Весляры не змаглi зладзiць з моцным цячэннем, лодкi трапiлi ў гiдратэхнiчнае збудаванне, перавярнулiся i развалiлiся на часткi. Загiнулi восем чалавек, пяцёра знiклi без вестак, выратавацца ўдалося аднаму. Па некаторых даных, у лiку загiнулых — мэр горада Сеўнiца i дэпутат парламента Славенii. Лодкi перавярнулiся каля водазабора гiдраэлектрастанцыi Бланка, размешчанай за сто кiламетраў ад сталiцы Славенii.

* 28-гадовы жыхар Баранавiчаў заявiў у мiлiцыю, што старшыня аднаго сельгаскааператыва вымагае ў яго 500 долараў, а ўзамен абяцае выдзелiць жыллё. Пры гэтым заяўнiк перадаў камп’ютарны дыск, на якiм была запiсана размова з вымагальнiкам наконт хабару. Але следства ўстанавiла, што запiс размовы сфальсiфiкаваны, а за лжывы данос iснуе адпаведны артыкул. Узбуджана крымiнальная справа.

* У Новасiбiрску закаханыя настолькi горача цалавалiся на чыгунцы, што не заўважылi цягнiка, у вынiку дзяўчына загiнула, малады чалавек атрымаў раненнi. 27-гадовая дзяўчына i 30-гадовы малады чалавек былi настолькi захопленыя адзiн адным, што не чулi гучныя сiгналы, якiя падаваў машынiст. Са слоў вiдавочцаў, дзяўчына ўсё ж ўбачыла цягнiк, калi ён быў зусiм блiзка. У долi секунды яна пхнула каханага з чыгуначных пуцей, але сама адскочыць не паспела.

* У Нiжнiм Ноўгарадзе падчас будаўнiцтва новай веткi метро ў зямлi быў знойдзены чыгун з залатымi чырвонцамi часоў iмператара Мiкалая Другога. Будаўнiкi метро, паводле даных праваахоўных органаў, знiклi са знойдзеным скарбам. Паводле Грамадзянскага кодэкса РФ, калi знойдзеныя прадметы прызнаюцца помнiкамi гiсторыi або культуры, то iх неабходна перадаць дзяржаве.

* Каля 40 чалавек загiнулi ў вынiку крушэння парома ў рацэ Іваi ў М’янме. У момант аварыi на борце судна знаходзiлася больш за 80 чалавек. Цяпер вядома аб 44 выратаваных. Што стала прычынай аварыi, невядома.

* У пункце пропуску "Новая Гута" пры афармленнi аўтамабiля была знойдзена пад асабiстымi рэчамi дзяўчынка 2001 г.н. — дачка адной з пасажырак аўтамабiля. Акрамя iх, у аўтамабiлi знаходзiўся 21-гадовы жыхар Беларусi i 52-гадовая жыхарка Расii. Усе яны ехалi ў госцi да родзiчаў, аднак дазволу бацькi на вываз дзiцяцi за мяжу ў мацi не было. Таму i вырашылi скарыстацца такiм неардынарным спосабам. Вадзiцелю, мацi дзяўчынкi i грамадзянцы Расii прысуджаны штраф у памеры 20 базавых велiчынь кожнаму за парушэнне дзяржаўнай мяжы, дзiця разам з мацi перададзеныя ўкраiнскiм памежнiкам.

Поўны абзац

* Амерыканская палiцыя актыўна ўкараняе новы спосаб атрымання ад насельнiцтва iнфармацыi аб злачынствах — з дапамогай ананiмных SMS. Разлiчаны ён, першым чынам, на падлеткавае i маладзёжнае асяроддзе. SMS-паведамленне паступае на спецыяльны iнтэрнэт-сервер, на якiм тэлефонны нумар, з якога яно прыйшло, зашыфроўваецца i толькi пасля гэтага паведамленне атрымлiвае палiцыя. SMS-iнфарматары могуць атрымаць узнагароду, прычым таксама цалкам ананiмна. Адзiная цяжкасць, з якой сутыкнулiся палiцэйскiя — неабходнасць вывучэння падлеткавага SMS-слэнга.