Фэст “Вольнае паветра” ператвараецца ў міжнародны і сямейны

Источник материала:

19 ліпеня на хутары Шаблі, што пад Валожынам, адбудзецца трэці фестываль этнічнай музыкі “Вольнае паветра”. Сёлетні фэст стане міжнародным, бо да ўдзелу запрошаны вядомы расійскі этна-джаз гурт “Zventa Sventana”, і сямейным - для самых меншых наведвальнікаў фэсту адкрыецца летнік “Паветрык”, дзе дзецьмі будуць апекавацца прафесіяналы-мастакі. Апроч “стандартных” этнічных беларускіх гуртоў на фестывальную сцэну выйдуць “нефарматныя” госці - гурты “ДетиДетей” і “NRM”.

Фішкай кожнага фэсту становіцца прыезд вядомых замежных гасцей. У мінулым годзе “Вольнае паветра”, напрыклад, наведаў расійскі музычны крытык Арцемій Троіцкі, які параўнаў фэст з ціхім і натхняючым “этна-Вудстокам”.

Адзін з арганізатараў фэсту Уладзімір Шаблінскі расказаў "Еўрарадыё" пра адметнасці сёлетняй імпрэзы, назваўшы імёны гуртоў, якія дагэтуль не гралі на “паветранай” сцэне.

Уладзімір Шаблінскі: “Мы пакажам новыя музычныя гурты, якія не выступалі ў мінулыя гады. Магчыма, не ўсе яны вытрымліваюць фармат этна-музыкі: напрыклад, будзе ўдзельнічаць гурт “ДетиДетей”, якія граюць у крыху іншай стылістыцы, магчыма, выступяць "NRM" і Вайцюшкевіч з праектам “Я нарадзіўся тут”.

Аднак, па словах Шаблінскага, асноўны касцяк удзельнікаў складуць гурты, якія граюць этнічную музыку: штогадовыя ўдзельнікі фэсту гурт “Троіца”, “Палац”, “Нагуаль”, не зусім фарматны для фэсту, аднак вельмі цікавы гурт з Мсціслаўля “Хуткі Смоўж”…

Самае радаснае, што cёлета “Вольнае паветра” мае намер ператварыцца ў міжнародны фэст, які, як лічыць Уладзімір, стане адметнай падзеяй у культурным жыцці Беларусі.

Уладзімір Шаблінскі: “Зараз мы вядзем перамовы з расійскім гуртом “Zventa Sventana”… Будуць цікавыя нумары, вельмі годныя, і фестываль, безумоўна, стане ўнёскам у развіццё беларускай культуры”.

Разам з тым сёлетняе “Вольнае паветра” дае магчымасць наведаць фэст сем’ямі, дзеля чаго будзе арганізаваны дзіцячы летнік “Паветрык” з адмысловай праграмай для маленькіх. У выніку дзеці, на чале з гуртом “ДетиДетей”, выйдуць на галоўную сцэну і адкрыюць фестываль…

Каб стаць гледачом "Вольнага паветра" трэба зарэгістравацца на www.volnaepavetra.by.

Фота: www.generation.by

Первоисточник: