Пешаход: сябар ці вораг?

Источник материала:

Гэтымi днямi сталiчная Дзяржаўтаiнспекцыя праводзiць спецыяльныя комплексныя мерапрыемствы пад умоўнай назвай "Пешаходны пераход". Iх мэта — прадухiленне гiбелi пешаходаў у дарожна-транспартных здарэннях на пешаходных пераходах, актывiзацыя работы супрацоўнiкаў ДАI па забеспячэннi бяспекi дарожнага руху. Штодзень супрацоўнiкi раённых аддзелаў ДАI г. Мiнска будуць несцi службу ў зонах нерэгулюемых пешаходных пераходаў у ранiшнi i вячэрнi час, праводзiць прафiлактычную работу не толькi з пешаходамi, але i з вадзiцелямi транспартных сродкаў. Для выяўлення парушэнняў правiлаў праезду пешаходных пераходаў плануецца прымяненне прыбораў фота- i вiдэафiксацыi.

Адна з прычын правядзення ўказаных мерапрыемстваў — павелiчэнне колькасцi парушэнняў праезду пешаходных пераходаў i як вынiк — учыненне дарожна-транспартнага здарэння. Часам чалавек, якi сядзiць за рулём аўтамабiля, зняважлiва ставiцца да iншых удзельнiкаў дарожнага руху i самым нахабным чынам парушае правiлы праезду пешаходных пераходаў. Адсюль i няўмольная статыстыка. Так, за 6 месяцаў 2008 года па г. Мiнску зафiксаваны 134 выпадкi парушэння праезду пешаходнага пераходу, для параўнання: у 2007 годзе iх было толькi 123. Гэты вiд парушэння знаходзiцца на першым месцы сярод прычын ДТЗ. Другое ж "ганаровае" месца займае пераход праезнай часткi ў неўстаноўленым месцы. I толькi такiя парушэннi, як перавышэнне хуткасных рэжымаў, правiлаў манеўравання, нецвярозы стан вадзiцеляў, парушэнне правiлаў праезду скрыжаванняў i да т.п. замыкаюць гэты спiс. Як гаворыцца, факт застаецца фактам.

Цi можа пешаход з бяспекай для сябе i свайго здароўя перайсцi праз вулiцу, дзе iмчацца аўтамабiлi? Паважаныя вадзiцелi, задумайцеся. Магчыма, калi-небудзь i вы будзеце на яго месцы. Таму, убачыўшы чалавека, якi наблiжаецца да пешаходнага пераходу, або нават пешаходны пераход без людзей, загадзя збаўце хуткасць i будзьце гатовыя да тармажэння. Калi пешаход перабягае дарогу, трэба не аб’язджаць яго, а тармазiць, таму што чалавек можа спынiцца, пабегчы наперад цi назад. Згодна з патрабаваннямi пункта 117 Правiлаў дарожнага руху, "калi перад пешаходным пераходам спынiўся цi запаволiў рух транспартны сродак, то вадзiцелi iншых транспартных сродкаў, што рухаюцца па суседнiх палосах руху ў спадарожным накiрунку, павiнны знiзiць хуткасць руху аж да поўнага спынення i пры наяўнасцi пешаходаў саступiць iм дарогу". А пешаходам жыццёва важна запомнiць, што згодна з патрабаваннямi пункта 18.4 Правiлаў дарожнага руху, забараняецца "выходзiць на праезную частку дарогi з-за транспартнага сродку, якi стаiць, цi iншага аб’екта, якi абмяжоўвае агляднасць дарогi, не пераканаўшыся ў адсутнасцi транспартных сродкаў, якiя наблiжаюцца".

Паверце, сваiмi правапаслухмянымi дзеяннямi вы выратуеце не толькi жыццё i здароўе пешахода, але i свой лёс.