Кошт будаўніцтва жылля можа павялiчыцца на 10—12 працэнтаў?

Источник материала:

Як паведамлялася раней, у адпаведнасцi з пастановай Савета Мiнiстраў № 1245 з 1 верасня па 30 лiстапада гэтага года ўводзiцца павышаючы каэфiцыент 1,44 да тарыфных ставак работнiкаў падрадных будаўнiчых арганiзацый, занятых на аб’ектах жыллёвага будаўнiцтва. Паведамлялася, што затраты будуць уключацца ў акты выкананых работ, што пацягне за сабой падаражанне жылля на пярвiчным рынку.

Спецыялiсты Мiнбудархiтэктуры адзначылi карэспандэнту "Звязды", што наўскiдку новы механiзм аплаты працы будаўнiкам можа выклiкаць падаражанне будаўнiцтва жылля ў Беларусi прыкладна на 10—12 працэнтаў. Суразмоўца газеты паведамiў, што канкрэтныя лiчбы падаражання стануць вядомыя не раней чым праз месяц, калi будзе дакладна падлiчаны сабекошт будаўнiцтва жылля, улiчваючы павышаючы каэфiцыент да тарыфных ставак.

Эксперт упраўлення жыллёвага будаўнiцтва Мiнiстэрства архiтэктуры i будаўнiцтва Беларусi ўдакладнiў, што дадзеная норма прынята Саветам Мiнiстраў на 3 месяцы ў якасцi эксперыменту. На думку распрацоўшчыкаў новаўвядзення, такое рашэнне павiнна паспрыяць прытоку квалiфiкаваных кадраў, павялiчыць якасць i прадукцыйнасць працы ў сферы жыллёвага будаўнiцтва. Разам з тым, калi плюсы ад увядзення новай формы аплаты працы будаўнiкоў будуць мiнiмальнымi, то эксперымент прызнаюць адмоўным i павышаючы каэфiцыент будзе перагледжаны цi ўвогуле адменены.