Пiва "Крынiцы" прызнана лепшым ва Украiне

Источник материала:

Пiвавары "Крынiцы" зноў прадэманстравалi высокi клас майстэрства: трыумфам скончыўся iх удзел у ХІ Мiжнародным конкурсе "Свята пiва-2008", якi праходзiў напрыканцы жнiўня ў Кiеве. Найвышэйшую адзнаку — Гран-пры конкурсу — атрымала пiва "Александрыя", "Крынiца экспартнае" атрымала залаты медаль, сярэбраная ўзнагарода дасталася новай, яшчэ не прадстаўленай на рынку, марцы ад "Крынiцы".

Такiя вынiкi былi немагчымыя яшчэ зусiм нядаўна, аднак праведзеная з дапамогай дзяржавы рэканструкцыя прадпрыемства, сучасныя кадравая палiтыка i метады даследавання рынку даюць вiдавочны вынiк. Сёння "Крынiца" — буйнейшы айчынны вытворца i экспарцёр: яго прадукцыя шырока прадаецца не толькi ў памежных расiйскiх абласцях, але i больш далёкiх рэгiёнах у тым лiку на радзiме вядомай маркi пiва "Балтыка" — у Санкт-Пецярбургу.

Генеральны дырэктар "Крынiцы" Рыгор Пяткевiч, якому ўдалося за непрацяглы час сфармiраваць каманду аднадумцаў, лiчыць медалёвы "дождж" на мiжнародных дэгустацыях добрым пачаткам. Ужо цяпер расiяне прапануюць прадаваць пiва "Крынiцы" пад сваiмi гандлёвымi маркамi. Цiкаўнасць да якаснага, вырабленага без дабавак па класiчнай тэхналогii, беларускага хмяльнога напою праяўляюць i ў iншых краiнах.

Сёння ўжо не гучыць пытанне, цi можна вырабiць добрае пiва з айчыннага ячменю. Дэманструючы выдатныя эканамiчныя паказчыкi, "Крынiца" працуе выключна на iм. Ад прафесiяналiзму пiвавараў дзяржава сёлета атрымала ўжо (у выглядзе ўсiх падаткаў i адлiчэнняў ад "Крынiцы") каля 80 мiльярдаў рублёў. Лiчба гэта была б яшчэ большай, калi б удалося адшукаць гнуткi механiзм фармiравання цаны на айчыннае пiва, а гандаль праяўляў большую зацiкаўленасць у яго продажы.