Малых — на прышчэпкі!

Источник материала:

Трохмесячных малых у Мiнску будуць бясплатна прышчэплiваць адразу супраць чатырох iнфекцый — дыфтэрыi, коклюшу, слупняку i ХІБ-iнфекцыi.

Для вакцынацыi медыкi выкарыстаюць камбiнаваную 4-кампанентную вакцыну. Ёю ўжо прышчэплены больш за дзве тысячы дзяцей, нiякiх ускладненняў пасля прышчэпкi не зарэгiстравана, паведамiла загадчыца аддзялення iмунапрафiлактыкi Мiнскага гарадскога цэнтра гiгiены i эпiдэмiялогii Iрына Глiнская. Гэта камбiнаваная вакцына занесена ў Гарадскi каляндар прафiлактычных прышчэпак. У адпаведнасцi з iм мiнчане атрымлiваюць абарону яшчэ ад 10 iнфекцый: вiрусных гепатытаў А i В, дыфтэрыi, коклюшу, адру, краснухi, полiямiэлiту, слупняку, туберкулёзу, эпiдэмiчнага паратыту — свiнкi. Таксама ў сталiцы працягваецца iмунiзацыя супраць ХIБ-iнфекцыi дзяцей ва ўзросце ад паўгода да 2 гадоў. З лiпеня гэтага года супраць ХIБ-iнфекцыi прышчэплены больш за 10 тысяч дзяцей. Вакцынацыя працягнецца да канца кастрычнiка. Запланавана прышчапiць яшчэ 16 тысяч маленькiх мiнчан.

Як паведамiла намеснiк старшынi Камiтэта па працы, занятасцi i сацыяльнай абароне Мiнгарвыканкама Святлана Лiцвiнка, на працягу тыдня сацыяльныя работнiкi наведаюць дома i ў стацыянарных лячэбных установах мiнчан пажылога ўзросту, якiя з-за дрэннага здароўя не змогуць прысутнiчаць на святочных мерапрыемствах, i ўручаць сувенiры i падарункi. У гэтыя днi ў тэрытарыяльных цэнтрах сацыяльнага абслугоўвання насельнiцтва для пажылых людзей будуць арганiзаваны канцэрты, конкурсы, чаяпiцце. У горадзе таксама адбудуцца дабрачынныя спектаклi, кiнасеансы, вечары адпачынку. Мiжнародны дзень пажылых людзей адзначаецца 1 кастрычнiка. На ўлiку ў органах сацыяльнай абароны сталiцы знаходзяцца больш за 360 тысяч атрымальнiкаў пенсii. Па вынiках абследаванняў матэрыяльна-бытавых умоў жыцця пажылых гараджан выяўлена 19 224 адзiнокiя i 54 976 адзiнока пражываючых пенсiянераў. Усе яны знаходзяцца на ўлiку ў тэрытарыяльных цэнтрах сацыяльнага абслугоўвання Мiнска.