Два гады на развітанне з чэргамi

Источник материала:

У аўтсайдарах — сталiца

Як канстатуюць у Мiнiстэрстве працы i сацабароны, на сёння цалкам лiквiдавана чарга на змяшчэнне ў "звычайныя" дамы-iнтэрнаты для ветэранаў i iнвалiдаў. Іншая справа — спецыялiзаваныя ўстановы для псiханеўралагiчных хворых. Сёння агульная чарга людзей, якiм з-за дрэннага здароўя неабходныя асаблiвыя ўмовы пражывання, складае каля 800 чалавек. Пры гэтым найбольш вострай праблема "недахопу плошчаў" ужо традыцыйна застаецца ў сталiцы.

— Каб зняць усе пытаннi з улiкам як выхаду на санiтарныя нормы пражывання ў 7 квадратных метраў на чалавека, так i магчымага павелiчэння патрэбы, у Мiнску неабходна мець прынамсi 1000 дадатковых iнтэрнатных месцаў, — кажа начальнiк упраўлення стацыянарных устаноў, iнвестыцый i капiтальнага будаўнiцтва Марыя Гарбацэвiч. — Так, на сёння сталiца прадставiла свае прапановы па пашырэннi сеткi сацыяльных устаноў, пакуль гаворка iдзе аб стварэннi 4 новых аб’ектаў. Пры гэтым галоўная задача тут застаецца ранейшай — ва ўсiх без выключэння рэгiёнах Беларусi чэргi ў дамы-iнтэрнаты павiнны знiкнуць да канца 2010 года.

Хто i калi заплацiць грошы?

Вялiкiя праблемы са здароўем або паважны ўзрост пры адсутнасцi блiзкiх працаздольных сваякоў — галоўныя ўмовы для пражывання ў iнтэрнаце бясплатна. Iншыя могуць атрымаць месца... за грошы. Такiя прыклады ўжо ёсць, у прыватнасцi, у Рэспублiканскiм iнтэрнаце ветэранаў вайны i працы налiчваецца больш за два дзясяткi "платнiкаў". Поўны кошт складае 744 тыс. рублёў, штомесяц гэта сума iндэксуецца на 0,5 працэнта. Што ж да крынiц аплаты, то iх дзве — пенсiя плюс сродкi дзяцей.

Варта заўважыць, што аплата дзяцей за пражыванне бацькоў у дамах iнтэрнатах актыўна выкарыстоўваецца амаль ва ўсiм свеце, дзе-нiдзе гэта нават з’яўляецца своеасаблiвым бiзнэсам. Аднак для таго, каб такая практыка атрымала пашырэнне ў Беларусi, адной прапановы недастаткова. Неабходны належныя ўмовы. За апошнiя гады ў беларускiх iнтэрнатах адбылiся рамонты, на крайнi выпадак тут устаноўленыя аўтаматычныя пажарныя сiгналiзацыi i апавяшчальнiкi, многiя сацыяльныя ўстановы "выйшлi" на санiтарныя нормы па плошчы — 7 квадратных метраў на чалавека. Плюс да таго, у большасцi рэгiёнаў знiклi некалi хранiчныя цяжкасцi з забеспячэннем адзеннем i абуткам. Праўда, на думку мiнiстра працы i сацыяльнай абароны Уладзiмiра Патупчыка, гэтага ўжо недастаткова — жыхары iнтэрнатаў павiнны мець не толькi неабходную колькасць рэчаў, але i магчымасць апранацца сучасна.

Стаўка на сваё

Тым часам галоўная тэма на сёння — падрыхтоўка iнтэрнатаў да зiмы. Яна практычна закончылася, у сацыяльных установах заменены састарэлыя камунiкацыi, створаныя неабходныя запасы палiва. Пытанне застаецца з адным — коштам апошняга. У прыватнасцi, пакуль у трох дамах-iнтэрнатах на Гомельшчыне i ў Мiнску, а таксама санаторыi для iнвалiдаў "Вяжуцi" працягваюць выкарыстоўваць дарагое пячное бытавое палiва. Таму, зазначыла Марыя Гарбацэвiч, кацельнi гэтых устаноў неабходна перавесцi на больш танныя газ i мясцовыя крынiцы ацяплення — чакаецца, што такi пераход павiнен адбыцца да канца 2010 года.