Спортлато-2008. Успомнiць кiно i злавiць удачу

Источник материала:

З мiнулай нядзелi ў эфiры Першага канала "прапiсалася" новая электронная iнтэрактыўная гульня — "Спортлато 5 з 36". Першыя стаўкi ў ёй удзельнiкi зрабiлi падчас прэзентацыi праекта, 2 кастрычнiка, а вынiкi сталi вядомыя ў прамым эфiры першага выпуску "Спортлато", здымкi якога ўдалося падгледзець (i нават паўдзельнiчаць у iх) карэспандэнту "Звязды".

...Гасцей студыi першага тэлевiзiйнага выпуску "Спортлато" цiкавiла толькi адно пытанне: уласна кажучы, што трэба рабiць? "Адказваць на пытаннi, калi пашанцуе", — сустракаючы нас за дзве гадзiны да прамога эфiру, патлумачыла рэдактар. Але ад гэтага нiчога не праяснiлася, таму ўдзельнiкi — пераважна папулярныя артысты i вядомыя беларускiя спартсмены — строiлi версii адна за адну цiкавейшыя. Грымёр Маша тым часам наводзiла прыгажосць на ўсiх без выключэння, угаворваючы асаблiва ўпартых прадстаўнiкоў моцнага полу: "А раптам пасля гэтага эфiру вам усмiхнецца асабiстае шчасце?".

Рэдактар праграмы Вольга Капёнкiна раздала прысутным каляровыя бэджыкi з нумарамi i iмёнамi, i правяла кароткi "курс маладога байца". Удзельнiкi — 21 чалавек — падзяляюцца на тры каманды: жоўтая, аранжавая, сiняя. З дапамогай латарэйнага барабана з кожнай каманды выбiраецца па 1 гульцу, i гэтыя шчаслiўчыкi аўтаматычна ўжо выйграюць па 500 тысяч беларускiх рублёў. Астатнiм трэба, седзячы на трыбуне, незалежна ад пачуцця зайздрасцi цi радасцi рабiць шчаслiвы выгляд i апладзiраваць. Далей усё залежыць ад эрудыцыi i рэакцыi трох выбраных — iм задаюць пытаннi, звязаныя з папулярнымi савецкiмi кiнафiльмамi — напрыклад, трэба працягнуць вядомую фразу. У нашай групе, куды трапiлi, у прыватнасцi, спявачкi Жанет i Наталля Тамела, усе чамусьцi рэпецiравалi "Хто возьме бiлетаў пачак...". (Асабiста я была ўпэўненая, што прагучыць што-небудзь тэматычнае са славутага фiльма Гайдая "Спортлато-88" — "Катаванне апельсiнамi працягвалася тры гадзiны", напрыклад.)

Наступны этап шоу нагадвае колiшнюю забаўляльную перадачу "Адгадай мелодыю" — хто першы нацiсне на кнопку, той адказвае, i калi адкажа правiльна — атрымлiвае бал. За тры правiльныя адказы гулец "зарабляе" 1 мiльён беларускiх рублёў i прапанову ад вядучага рызыкнуць i згуляць у супергульню. У ёй гульцу паказваецца экран з 36 лiчбамi, 5 з якiх — "залатыя". Глядзець на экран можна лiтаральна некалькi секундаў, а потым трэба па памяцi назваць усе пяць лiчбаў. Калi атрымаецца — будзе i суперпрыз, 6 мiльёнаў рублёў, калi памяць падвядзе — увесь выйгрыш "згарае" да першапачатковай сумы ў 500 тысяч рублёў.

Праглынуўшы гэту iнфармацыю, у чаканнi эфiру ўдзельнiкi, як водзiцца, абмяркоўвалi, цi даводзiлася каму-небудзь выйграваць у латарэю (эх, i нешанцоўныя нашы артысты!), а таксама разважалi, на што варта патрацiць выйгрыш, калi сёння ўсмiхнецца ўдача.

— Я так думаю, пераможца аплацiць бензiн усiм удзельнiкам, хто сюды прыехаў на машыне, — жартам прапанавала тэлевядучая Алена Спiрыдовiч.

— А некаторыя, мiж iншым, пешшу прыйшлi! — парыравала спявачка Іскуi Абалян. — Так што лепш — усiх у рэстаран.

— Хоць бы на метро праезд аплацiлi, — пад агульны смех уступiў у гутарку салiст гурта "Дразды" Вiталь Карпанаў.

— Не, лепш усё ж у рэстаран. Так што калi барабан абярэ мяне (а як iнакш, з маiм прозвiшчам?), я частую! — абнадзеiла спартсменка, спявачка i тэлевядучая Вольга Барабаншчыкава.

Пакуль грымiравалiся, запаўнялi карткi ўдзельнiкаў i жартавалi, час мiнуў незаўважна. Папярэджанне рэжысёра — хутка прамы эфiр, трэба iсцi ў студыю — застала ўсiх знянацку.

Дарэчы, гэта была першая праверка прамым эфiрам тэлевiзiйнай студыi ў новым будынку факультэта журналiстыкi БДУ. I стала зразумела, што ўсе расповеды выкладчыкаў i студэнтаў пра самае сучаснае абсталяванне — не пахвальба, а канстатацыя факта.

Што да гульнi, то 15 хвiлiн эфiру, здаецца, увогуле прайшлi вокамгненна. Толькi што трое вядучых — а праграму будуць па чарзе весцi Павел Шастакоў, Дзянiс Кур’ян i акцёр Анатоль Голуб — пiкiравалiся, каму дастанецца першы эфiр, а ўжо i барабан выбраў траiх шчаслiўчыкаў, i гучаць вiдэапытаннi з вядомых кiнастужак — "Iронiя лёсу", "Не можа быць", "Iван Васiльевiч мяняе прафесiю", "Джэнтльмены ўдачы". Удача на гэты раз, да слова, усмiхнулася спявачцы Нiне Багданавай, якая аказалася самай спрытнай i дасведчанай. Але ад супергульнi пераможца катэгарычна адмовiлася: "Мне i так ужо вельмi пашанцавала. Хочацца, каб першы вялiкi выйгрыш дастаўся "чалавеку з народа", i каб гэтыя грошы прынеслi яму шчасце". Пасля эфiру, зрэшты, Нiна прызналася, што гуляць далей проста не змагла б:

— Нават не ведаю, як здолела правiльна адказаць на ўсе пытаннi. У мяне трэслiся рукi i ногi, думала, што ад хвалявання ўпаду.

— Але ж павiнен быць прафесiйны iмунiтэт да працы перад камерай? — пацiкавiлiся мы.

— Не, якi там iмунiтэт, хвалюешся заўжды, як у першы раз.

Мiж iншым, па вынiках першага розыгрышу "Спортлато 5 з 36" 5 лiчбаў не ўгадаў нiхто, а вось колькасць супадзенняў 2—4 лiчбаў (i адпаведна прызёраў) перавысiла 1000. Сума выйгрышу складала ад 4230 да 319 850 рублёў. Наступны розыгрыш адбудзецца ўжо ў гэтую сераду, 15 кастрычнiка, i далей будзе працягвацца двойчы на тыдзень — па серадах i нядзелях.