Аўтазладзеі "закаханыя" ў "Фольксваген"...

Источник материала:

Пытанне аб супрацьдзеяннi крымiнальнаму аўтабiзнэсу вынесена першым на парадак дня пазачарговага пасяджэння Савета мiнiстраў унутраных спраў дзяржаў — удзельнiц СНД, што пройдзе з 22 па 24 кастрычнiка ў Сочы.

Паводле звестак упраўлення iнфармацыi i грамадскiх сувязяў МУС, крымiнальны аўтабiзнэс у большай ступенi становiцца сферай дзейнасцi злачынных груп. Злачынныя фармiраваннi, што дзейнiчаюць на тэрыторыi нашай краiны, кансалiдуюцца з групоўкамi з краiн СНД i, у першую чаргу, з Расii. На сёння беларускiмi праваахоўнiкамi расшукваецца звыш 19 тысяч выкрадзеных аўтамашын, 369 з якiх выкрадзены сёлета. А найбольш часта зладзеi "прыватызуюць" "Фольксвагены", ВАЗы i "Аўдзi". У Беларусi з разлiку на 100 тысяч насельнiцтва ў сярэднiм рэгiструецца 23 крадзяжы аўтатранспарту, тады як у суседнiх Польшчы i Лiтве — 183 i 134 адпаведна. У рэспублiцы аўтакрадзяжы не перавышаюць 1 працэнта ад агульнай колькасцi рэгiструемых злачынстваў, аднак iх грамадская небяспека вельмi высокая з-за значнага ўрону, якi наносiцца пацярпелым. Толькi летась матэрыяльныя страты ад крадзяжоў аўто склалi больш за 5 мiльёнаў долараў ЗША, за 9 месяцаў гэтага — 2,5 мiльёна.