Вяскоўцам выплачана рознiца памiж цэнамi за яблыкi

Источник материала:

Вясковец назбiраў больш за 400 кiлаграмаў яблыкаў i адвёз iх у мясцовы магазiн. Разлiчыцца за iх абяцалi на працягу аднаго-двух дзён, паколькi, як потым журналiсту "Звязды" патлумачылi ў Валожынскiм раённым спажывецкiм таварыстве, грошы бралiся не з прыбытку магазiна, яго абаротных сродкаў, а iшлi па лiнii крэдыту. На афармленне патрэбных папер якраз i трэба быў гэты час.

Але ўжо ўвечары таго ж дня нашаму заяўнiку патэлефанавалi з магазiна, маўляў, закупачная цана на яблыкi знiжана з 250 да 200 рублёў за кiлаграм. Адбылося гэта ў сувязi з тым, што перапрацоўчыя прадпрыемствы таксама пачалi менш плацiць за здадзеныя iм яблыкi. Але наш чытач спасылаўся на тое, што цану ў 250 рублёў ён бачыў у мясцовай газеце (пры меншай, не выключана, можа, i не стаў бы здаваць яблыкi). У самiм магазiне на момант звароту туды Аляксандра Уладзiмiравiча таксама нiчога пра новую цану не ведалi, хоць на той момант яна ўжо, як кажуць, уступiла ў сiлу. Мы лагiчна паразважалi i зрабiлi выснову: вiны за здатчыкам нiякай няма (ён са свайго боку выканаў усе абавязацельствы: сабраў i сам завёз яблыкi), адсутнасць патрэбнай iнфармацыi была цалкам на сумленнi работнiкаў спажывецкага таварыства. Значыць, вясковец мае права атрымаць грошы за здадзеную прадукцыю па ранейшым закупачным кошце. Дарэчы, у самiм таварыстве з гэтым пагаджалiся. А днямi мы атрымалi ўжо афiцыйнае рэагаванне з Мiнскага абласнога саюза спажывецкiх таварыстваў, чый спецыялiст упраўлення нарыхтовак выязджаў на месца для разбору сiтуацыi. Факты, як прынята гаварыць, пацвердзiлiся.

"...Як высветлiлася пры выездзе да здатчыка, насельнiцтва вёскi не было своечасова праiнфармавана аб знiжэннi закупачнай цаны". Улiчваючы гэта, было прынята рашэнне выплацiць вяскоўцам, якiя здалi яблыкi па "старых" цэнах, у тым лiку i Аляксандру Уладзiмiравiчу Яцуку, рознiцу ў грашах, што ўтварылася на момант увядзення новай цаны. А яшчэ на месцы з кiраўнiцтвам, спецыялiстамi нарыхтоўчай галiны Валожынскага раённага спажывецкага таварыства была праведзена нарада, на якой разглядалiся пытаннi паляпшэння вядзення нарыхтоўчай дзейнасцi.