Аляксандр Лукашэнка:"Беларусь і В’етнам павiнны больш актыўна выкарыстоўваць патэнцыял гандлёва

Источник материала:

Беларусi i В’етнаму неабходна актывiзаваць гандлёва-эканамiчныя адносiны ў адпаведнасцi з iснуючымi ў краiн патэнцыяламi. Аб гэтым кiраўнiк дзяржавы Аляксандр Лукашэнка заявiў на сустрэчы з Надзвычайным i Паўнамоцным Паслом Сацыялiстычнай Рэспублiкi В’етнам у Рэспублiцы Беларусь Ву Суан Нiнем у сувязi з завяршэннем яго дыпламатычнай мiсii.

"Тавараабарот нядрэнны, ён развiваецца, але ўсё ж гэта не тыя лiчбы, якiя павiнны быць, — сказаў Прэзiдэнт. — Ужо сёння мы маглi б мець тавараабарот у 10 разоў большы".

Прэзiдэнт канстатаваў, што "ў адносiнах Беларусi i В’етнама няма закрытых тэм" i супрацоўнiцтва ажыццяўляецца ва ўсiх сферах. "В’етнам — не чужая для нас краiна", — падкрэслiў Аляксандр Лукашэнка. Ён таксама нагадаў, што Беларусь i В’етнам аб’ядноўваюць значныя гiстарычныя сувязi: беларускiя ваеннаслужачыя прымалi ўдзел у вызваленчай вайне ў В’етнаме, нашы спецыялiсты шмат зрабiлi па стварэнні в’етнамскай эканомiкi.

"Я да гэтага часу знаходжуся пад уражаннем ад свайго апошняга наведвання Ханоя. Мяне ўразiлi тэмпы развiцця вашай краiны", — сказаў кiраўнiк беларускай дзяржавы. Прэзiдэнт адзначыў, што бачыць вялiкiя знешнепалiтычныя перспектывы В’етнама. "Упэўнены, В’етнам зойме вельмi важнае месца на сусветнай арэне, i ў сувязi з гэтым я рады, што памiж нашымi краiнамi ўстанавiлiся такiя дружалюбныя адносiны", — сказаў ён.

Аляксандр Лукашэнка выказаў пажаданне, каб наступны пасол Сацыялiстычнай Рэспублiкi В’етнам ставiўся да сваёй дыпламатычнай мiсii ў нашай краiне гэтак жа добрасумленна, як Ву Суан Нiнь.

Прэзiдэнт дадаў, што беларускi бок з задавальненнем выкарыстоўваў бы i ў далейшым вопыт Ву Суань Нiня на карысць дзвюх дзяржаў. Ён адзначыў, што пасол, якi завяршае сваю мiсiю, у будучым мог бы актыўна дапамагаць развiццю гандлёва-эканамiчных сувязяў памiж Беларуссю i В’етнамам.

У сваю чаргу пасол В’етнама Ву Суан Нiнь падкрэслiў, што Беларусь стала для яго фактычна роднай краiнай. Ён нагадаў, што прымаў удзел у працэсе ўстанаўлення дыпламатычных адносiнаў памiж нашымi краiнамi i быў сведкам таго, як паспяхова ўмацоўвалiся беларуска-в’етнамскiя адносiны.