Далоні на камянi

Источник материала:

Памятны знак — вялiзны камень, на якiм высечаны адбiткi далоняў.

— Гэта адбiткi душаў людзей, якiя загiнулi, — растлумачыў iдэю магiлёўскi скульптар Андрэй Вараб’ёў. — Гэты камень мае ўнутраную энергетыку, бо далонь сiмвалiзуе жыццё чалавека i яго зварот да Бога.

Людзi, якiя прыйшлi на адкрыццё помнiка, iмкнулiся дакрануцца да далоняў на камянi. Яны ўсклалi кветкi i камянi паводле старажытнай яўрэйскай традыцыi. Дзецi запалiлi памiнальныя свечкi.

Помнiк месцiцца ў цэнтры Магiлёва, дзе ў гады вайны пачынаўся шлях у яўрэйскае гета на рацэ Дубравенка. Там было знiшчана 2 тысячы яўрэяў.

З iнiцыятывай усталяваць помнiк у памяць бязвiнных ахвяраў нацызму выступiла Магiлёўская яўрэйская абшчына. Яе грашыма падтрымалi магiляўчане розных нацый i народнасцяў, узростаў i сацыяльных становiшчаў. Кожны ахвяраваў колькi мог: нават зусiм не заможныя пенсiянеры прыносiлi па некалькi тысяч рублёў.

Адкрыццё помнiка адбылося ў межах Дня культуры Ізраiля ў Магiлёве. 12 лiстапада таксама адкрылiся выставы iзраiльскай лiтаратуры i жывапiсу, прайшлi сустрэчы з прадстаўнiкамi пасольства Iзраiля i кiнапаказ.