Васіль Спiрыдонаў: "Пераадолець сiндром першакласнiка"

Источник материала:

Чацвёртае паражэнне запар пацярпелi мiнскiя дынамаўцы ў чэмпiянаце Кантынентальнай хакейнай лiгi.19 лiстапада каманда саступiла чэмпiёну Расii "Салавату Юлаеву" з лiкам 1:3. У чатырох выязных матчах дынамаўцы набралi два ачкi, 13 лiстапада саступiўшы ў Мыцiшчах "Атланту" — 1:2 (у овертайме), 15 лiстапада ў Магнiтагорску "Металургу" — 3:4 (па булiтах), 17 лiстапада ў Чалябiнску "Трактару" — 2:5 i 19 лiстапада "Салавату Юлаеву". Пасля выязных матчаў галоўны трэнер мiнскага клуба Васiль Спiрыдонаў сустрэўся з журналiстамi i даў ацэнку выступленню каманды.

"Паездка была складаная — сустракалiся з камандамi, якiя ў сваiх дывiзiёнах займаюць першыя месцы. Камусьцi можа здацца, што 2 ачкi з 12 магчымых, гэта надзвычай мала. Але я бачу, што каманда б’ецца, стараецца, па арганiзацыi гульнi мы iдзём у правiльным накiрунку", — заявiў галоўны трэнер. Васiль Спiрыдонаў адзначыў, што ў матчах з "Металургам" i "Трактарам" дынамаўцы цалкам правалiлi першыя перыяды i назваў гэта "сiндромам першакласнiкаў", якiя не вытрымалi атмасферы на трыбунах, дзе балельшчыкi актыўна хварэлi за расiйскiя каманды. Наракаў трэнер i на судзейскiя памылкi. "Па некаторых матчах у мяне няма заўваг, а вось у матчы з "Трактарам" судзейства было агiднае. Засмучае той факт, што на матчы з "Дынама" ставяць судзiць навiчкоў". Васiль Спiрыдонаў зазначыў, што яго падапечныя не гатовыя пакуль гуляць у большасцi, хакеiсты страчваюць iнiцыятыву i нават прапускаюць. Перад серыяй хатнiх матчаў галоўны трэнер плануе папрацаваць над гэтым кампанентам, а таксама псiхалагiчна падвесцi каманду да разумення таго, што можна выйграць у любога сапернiка. Чарговыя хатнiя матчы мiнскага "Дынама" адбудуцца 24 лiстапада (супраць чалябiнскага "Трактара"), 27 лiстапада (супраць уфiмскага "Салавата Юлаева" i 29 лiстапада (супраць магнiтагорскага "Металурга").