Цэны панізiць!

Источник материала:

Старшыня Вiцебскага аблвыканкама Аляксандр Косiнец пасля таго як прайшоўся па рынках i крамах абласнога цэнтра, прыйшоў у жах ад некаторых цэнаў. Загадаў падначаленым разабрацца.

Напрыклад, цана на мяса ў аднаго гандляра — каля 13 тысяч беларускiх рублёў за кiло, а ў другога — 16... Высветлiлася пасля праверкi, што высокiя цэны прызначаюць iндывiдуальныя прадпрымальнiкi. Яны, дарэчы, не абавязаныя прадстаўляць эканамiчную абгрунтаванасць цаны на прадукцыю, што рэалiзуюць. У Вiцебскiм аблвыканкаме знайшлi выйсце, як "перавыхаваць" такiх несумленных: проста будзе адмоўлена ў месцах на рынках. А замест iх будуць рэалiзоўваць тое ж мяса i iншыя прадукты юрыдычныя асобы, гандляры спажывецкай кааперацыi, якiя проста не могуць перавышаць вызначаныя памеры гандлёвых надбавак.

Не было межаў здзiўленню i ад цаны ў канкрэтным магазiне на вiно амерыканскай вытворчасцi — пад 22 тысячы за бутэльку. Аказалася, што пастаўшчык з Мiнска ўжо "наварыў" на замежным вiне i аб’явiў пра адпускную цану — больш за 11 тысяч. Значыць, у Вiцебску прадаюць вiно па цане прыкладна ў два разы больш. Губернатар даў заданне разабрацца з кожным выпадкам.

Наогул у рэгiёне з падачы губернатара аб’яўлена "прадуктовая iнтэрвенцыя", што ў лiку iншага дазволiць i панiзiць цэны на прадукты i тавары. Асобны прыярытэт i ў накiрунку рэалiзацыi айчыннай прадукцыi. Вiцябчане, мiж iншым, запрошаныя прывезцi сваю прадукцыю на перадсвяточныя кiрмашы ў Мiнск.