Стаўкі зробленыя, ставак больш няма

Источник материала:

Падрыхтоўка да мiжнароднага конкурсу песнi "Еўрабачанне", якi налета пройдзе ў Маскве, у нашай краiне ўвайшла ў новую стадыю. Днямi прафесiйнае журы агучыла iмёны 15 выканаўцаў, адабраных для ўдзелу ў паўфiнале нацыянальнага адбору — тэлевiзiйнага праектf "ЕўраФэст". З iх лiку 15 снежня зноў жа рашэннем журы будуць абраныя фiналiсты (максiмум пяць чалавек), а ў студзенi сваё важкае слова скажуць тэлегледачы, назваўшы два iменi — асноўнага ўдзельнiка "Еўрабачання" ад Беларусi i "запаснога" кандыдата, на ўсякi выпадак.

У паўфiнале мы ўбачым i пачуем як добра знаёмых артыстаў (некаторых можна лiчыць ужо ветэранамi "ЕўраФэсту"), так i амаль палову "новенькiх". Цалкам спiс выглядае наступным чынам:

1. Дамiнiка (бэк-вакалiстка Тэатра песнi Ірыны Дарафеевай, якая раней выступала пад сцэнiчным iмем Забава. Дарэчы, сама Iрына Дарафеева сёлета ў склад журы не ўвайшла — магчыма i з тых меркаванняў, каб асабiстыя сiмпатыi не паўплывалi на выбар канкурсантаў. Замянiла калегу ў судзейскай брыгадзе Iна Афанасьева). Выканае песню "Mу dау".

2. Гурт "Вецер у галаве" (нягледзячы на тое, што гэта — iгракi на полi "ЕўраФэсту" зусiм новыя, журы, якое сёлета ўзначальвае Анатоль Ярмоленка, было ад выступлення калектыву ў захапленнi). Спяюць "И — или — и".

3. Вiкторыя Бялова (брэсцкая джазавая спявачка i актрыса) — "Dоn’t givе uр frоm lоvе".

4. Аляксей Крэчэт (удзельнiк беларускага адбору на конкурс "Новая хваля-2008", уладальнiк I прэмii мiжнароднага эстраднага конкурсу "Залаты крыж-2008", якi прайшоў на Мальце) — "Jоу аnd frееdоm".

5. Дзядзя Ваня (Iван Вабiшчэвiч, уладальнiк спецпрыза Алы Пугачовай на "Новай хвалi-2008") — "Оur Bеlаrussiа".

6. SingеRin (Кацярына Дудзiч) — "Dоn’t think аbоut it".

7. Гурт "Litеsоund" — "Mirасlе".

8. Дакота (Маргарыта Герасiмовiч, фiналiстка расiйскага тэлепраекта "Фабрыка зорак-7") — "Цябе забываю".

9. Венера — "Big gаmе".

10. Гюнеш — "Fаntаstiс girl".

11. Гурт "Кола" i Лiдзiя Заблоцкая (яркiя выразнiкi нацыянальнага каларыту — беларуская мова ў сукупнасцi з якаснай, "фарматнай" музыкай) — "Гудок".

12. Ганна Благава i Юрый Вашчук — "Позади".

13. Гурт "Thе Сhаmрiоns" — "Shаkе it Еurоре".

14. Аляксандр Патлiс — "Кто сказал".

15. Пётр Елфiмаў — "Еуе, thаt nеvеr liе".

Пракаментаваць выбар прафесiйнага журы мы папрасiлi мастацкага кiраўнiка тэлепраекта "ЕўраФэст" Аляксандра Цiхановiча. Паводле яго слоў, асноўнымi крытэрыямi суддзяў пры выбары былi — перш за ўсё песня, артыстычнае майстэрства i бездакорная iнтанацыя артыстаў, а таксама пастаноўка нумару, хоць бы ў пачатковым варыянце. Усiм паўфiналiстам былi дадзены парады па дапрацоўцы конкурсных нумароў — камусьцi параiлi звярнуць увагу на бэк-вакал, камусьцi прадумаць сцэнiчнае рашэнне... "Безумоўна, выканальнiцкi ўзровень гэтага года значна вышэйшы, чым быў раней, — мяркуе Аляксандр Цiхановiч. — Людзi пачалi разумець, што гэта за конкурс, падышлi да падрыхтоўкi сур’ёзна i адказна".

У 15, дарэчы, не аказалася некаторых папулярных артыстаў — так, адсеў не прайшлi Аляксандра Гайдук, Алена Грышанава, гурт "Топлес", Ганна Шаркунова, дуэт Вольга Плотнiкава — Дзмiтрый Врангель. У кулуарах кажуць — маўляў, не змаглi нiчым здзiвiць журы, у адрозненне ад больш удачлiвых канкурэнтаў. Што пакiдае спадзяванне пачуць усё ж на паўфiнальным канцэрце, якi адбудзецца 15 снежня ў прамым эфiры на Першым канале, нешта прынцыпова новае. I выбраць лепшае.