Крызiс i рынак

Источник материала:

Апошнi раз у мiнулым годзе быў на рынку 27 снежня i вось праз 15 дзён зноў наведаўся туды. Што змянiлася там за гэты час?

У маршрутным таксi давялося заплацiць ужо не 800 рублёў, а тысячу. Падумалася, што i на рынку цана на тавары падскочыла на дваццаць працэнтаў — крызiс. Але, на здзiўленне, у гэтым плане вялiкiх зрухаў не назiралася. Пайшоў у мясны павiльён — там найбольш тоўпiлiся людзi. Кошт свiнiны за паўмесяца не вырас — падалося, што на сала цана нават крыху ўпала. За кiлаграм прасiлi 9-12 тысяч, а самае адборнае мяса каштавала, як i паўмесяца таму — 18 тысяч рублёў. Выцягнулася чарга i каля павiльёна Баранавiцкай птушкафабрыкi.

Цэны выраслi галоўным чынам на iмпартную прадукцыю. Зазiрнуў у павiльён гаспадарчых тавараў i ўбачыў, што фарба, шпаклёўка замежнай вытворчасцi падскочылi ў цане на тыя ж 20 працэнтаў. Падаражала i марская рыба, а кошт нашай не падскочыў.

Каля выстаўленай мэблi нi душы. Каля дзiцячых калясак i веласiпедаў, якiя выцягнулiся ў два рады, толькi адна дзяўчынка, пакуль бацькi бавiлi час са знаёмымi, забаўлялася з веласiпедамi. Вось на гэтай пляцоўцы, сапраўды, крызiс.

На выхадзе з рынку, каля пункту абмену валюты, усяго восем чалавек. Можа, падцягнуцца пад канец дня, калi закончыцца гандаль?

А вось праз дарогу, насупраць цэнтральнай брамы, ААТ "Тураў" (Гомельшчына) гандляваў кансерваванай прадукцыяй, якую пакупнiкi расхоплiвалi ўпакоўкамi. Бляшанка зялёнага гароху каштавала 700 рублёў, фасолi кансерваванай — 1600 рублёў, кукуруза таксама недарагая — 1400 рублёў. А цыбуля ўсяго 470 руб/кг, у той час як на рынку яе кошт быў тысяча i больш.

З убачанага можна зрабiць выснову, што на сёння нiякiх узрушэнняў на рынку няма, а вось паход па крамах Баранавiчаў два днi таму прыцягнуў увагу да некаторых фактаў. Напрыклад, у мэблевых крамах стала больш прасторна, а яшчэ куплялi газавыя плiты, тэлевiзары... ды i каля абменнiкаў валюты стаялi чэргi.

Ажыятаж пойдзе на спад, але тут многае залежыць, мяркую, ад таго, як павядзе сябе расiйскi рубель.