Калі дазволу не было...

Источник материала:

Адасобленыя гаспадарчыя памяшканнi ў шматкватэрных жылых дамах (кладоўкi i iнш.), якiя пабудаваны па праекце ў адпаведнасцi з будаўнiчымi нормамi, прызначалiся для мэтавага выкарыстання (напрыклад, для захоўвання агароднiны). Яны не ўваходзяць у склад канкрэтнага жылога памяшкання, якое даецца ў карыстанне члену ЖБК, i калi кватэра аформлена ў прыватную ўласнасць, гэтыя памяшканнi не ўключаюцца ў тэхнiчны пашпарт.

У адпаведнасцi з жыллёвым заканадаўствам ЖБК абавязаны захоўваць правiлы i нормы тэхнiчнай эксплуатацыi жыллёвага фонду, правiлы ўтрымання жылога дома i тэрыторыi каля яго. Гэтымi правiламi не дапускаюцца самавольныя перапланiроўкi i перабудова жылых памяшканняў i гаспадарчых збудаванняў.

Усе члены ЖБК абавязаны выконваць патрабаваннi статута кааператыва, рашэннi агульнага сходу i праўлення кааператыва. Перабудова i перапланiроўка жылога памяшкання ў шматкватэрных жылых дамах пры неабходнасцi (напрыклад, у мэтах павышэння ўзроўню добраўпарадкаванасцi жылога памяшкання) можа ажыццяўляцца кааператывам або членамi ЖБК па рашэннi агульнага сходу членаў кааператыва (сходу ўпаўнаважаных) толькi з дазволу мясцовага выканаўчага i распарадчага органа на падставе праекта, якi распрацаваны i ўзгоднены ў вызначаным парадку.

Згодна з артыкулам 118 Жыллёвага кодэкса Рэспублiкi Беларусь грамадзяне, якiя дапусцiлi самавольную перабудову або перапланiроўку жылога памяшкання, падсобных памяшканняў, абавязаны за свой кошт прывесцi гэтыя памяшканнi ў ранейшы стан.

Цяпер аб кампетэнцыi жыллёва-будаўнiчага кааператыва (агульнага сходу кааператыва або сходу ўпаўнаважаных). Як ужо адзначалася, агульны сход як вышэйшы орган кiравання ЖБК можа санкцыянаваць перабудову i перапланiроўку жылога памяшкання ў доме ЖБК, але толькi з дазволу мясцовага выканаўчага i распарадчага органа. Безумоўна, такiя работы могуць быць дазволены толькi пры ўмове захавання законных правоў i iнтарэсаў усiх жыльцоў i ўласнiкаў як суседнiх кватэр, так i ўсiх жыльцоў дома.

У гэтым выпадку, несумненна, мае месца парушэнне правоў i iнтарэсаў iншых жыльцоў дома, паколькi ўсе яны сваiмi сродкамi ўдзельнiчалi ў фiнансаваннi i месцаў, i памяшканняў агульнага карыстання ў доме ЖБК.

У адпаведнасцi з артыкулам 9 ЖК грамадзяне маюць права патрабаваць лiквiдацыi акалiчнасцяў, якiя перашкаджаюць ажыццяўленню жыллёвых i звязаных з iмi правоў.