Крызіс супрацоўнiцтву не перашкода

Источник материала:

— Наша фiрма дастаткова ўпэўнена трымаецца, i ўвогуле мы не адчуваем уплыву сусветнага фiнансавага крызiсу. Мы ўваходзiм у сiстэму абараназдольнасцi Расii, адпаведна, дзяржава дапамагае нам, i гэта дазваляе нават ва ўмовах сусветнай нестабiльнасцi выплачваць стыпендыi лепшым студэнтам Гомельскага тэхнiчнага ўнiверсiтэта, — адзначыў вядучы спецыялiст Маскоўскага ААТ доследна-канструктарскага бюро iмя Паўла Сухога Ігар Строкаў.

Акрамя таго што ўнiверсiтэт, як i вядомае на ўвесь свет канструктарскае бюро, носяць iмя нашага славутага земляка Паўла Сухога, аднаго са стваральнiкаў рэактыўнай i звышгукавой авiяцыi, установы звязваюць цесныя сяброўскiя сувязi. У гэты дзень iх маральна i матэрыяльна адчулi 8 студэнтаў i 2 аспiранты ВНУ. Памер атрыманай стыпендыi, мiж iншым, складае каля 10 тысяч расiйскiх рублёў. У гэты ж дзень сваякi легендарнага авiяканструктара перадалi для ўнiверсiтэцкага музея акуляры, партфель, лагарыфмiчную лiнейку i некаторыя iншыя асабiстыя рэчы Паўла Восiпавiча Сухога.