Ала Пугачова спыняе канцэртную дзейнасць

Источник материала:

Расiйская прымадонна, Народная артыстка СССР Ала Пугачова спыняе канцэртную дзейнасць як спявачка. Аб гэтым яна заявiла на вялiкай прэс-канферэнцыi ў Маскве, перадаюць iнфармагенцтвы.

Паводле яе слоў, гэта адбудзецца пасля завяршэння юбiлейнага тура "ад красавiка да красавiка". "Я не буду цалаваць сцэну на развiтанне, проста спыняю канцэртную дзейнасць як спявачка", — сказала Пугачова.

Праз месяц Пугачовай споўнiцца 60 гадоў. Сярод тэм сённяшняй прэс-канферэнцыi — будучыя канцэрты спявачкi ў Дзяржаўным Крамлёўскiм палацы i алiмпiйскiм комплексе "Лужнiкi", а таксама юбiлейны тур па былых савецкiх рэспублiках i выхад у свет фотаальбома, прысвечанага спявачцы.

Ала Пугачова паведамiла пра дзве асноўныя прычыны свайго рашэння. "Першая — здароўе маё i сэрца не вельмi дазваляюць катацца туды-сюды на караблях i самалётах, i другая прычына — гэта тое, што пасля шэрагу аперацый, якiя мне давялося перанесцi, голас, зразумела, падсеў i не можа выразiць тых пачуццяў i iнтанацый, якiя мне б хацелася", — сказала народная артыстка.

Пугачова адзначыла, што, магчыма, сыходзiць са сцэны несвоечасова. "На дварэ крызiс, i трэба неяк зарабляць грошы", — з iронiяй патлумачыла яна. Аднак далей спявачка адзначыла, што цяпер надыходзiць час iншай Алы Пугачовай, у якой ёсць праца на радыё "Ала", у тэатры, у кiно, у выдавецкай дзейнасцi.

Ала Пугачова не ўпершыню заяўляе аб сваiм рашэннi пакiнуць сцэну. Раней спявачка таксама гаварыла, што здароўе не дазваляе ёй весцi канцэртную дзейнасць.