Люба

Источник материала:

Песня "Люба" Алы Фiялкоўскай i Якава Навуменкi гучыць з выклiкам, успрымаецца як пароль для знаёмства. Яна арганiчна ўваходзiць у бяседную канву, стварае даверлiвую атмасферу.

Звычайна на бяседзе спеўны тон задаюць мiлыя сяброўкi. Для iх i вакальных твораў напiсана больш, амаль усе душэўныя перажываннi iмi можна перадаць. Таму новая мiлагучная песня для юнакоў — падарунак для ўсёй грамады. Бо яна для агульнай радасцi, весялосцi, уцехi.

Тэмпераментна гучыць песня "Люба" ў выкананнi аднаго з яе аўтараў. Якаў Навуменка — адметны спявак. Многiя беларускiя вакальныя творы выйшлi ў свет у яго афармленнi. Але ж артыст часта выступае i як кампазiтар, актыўна супрацоўнiчае з беларускiмi паэтамi. Сумесна з Алай Фiялкоўскай напiсаў вельмi задушэўныя песнi "Светлая замова" i "Арабiнавы сум", якiя вельмi цёпла прыняты моладдзю.

Ў маiх думках несулад,

Сэрца кволiцца,

Эх, была ты не была,

Мая вольнiца.

Аддаю цябе назад,

Не паклiчу я

За дзявочую красу

Таямнiчую.

Прыпеў:

Люба, Люба, Люба,

Любая мая.

Прыгажэй на свеце

Не сустрэну я.

Люба, Люба, Люба,

Не знайду яшчэ

Нi такой усмешкi,

Нi такiх вачэй.

А сябры мае адно

Толькi сварацца.

Кажуць — буду сумаваць,

Буду каяцца.

У мiнулае шляхi

Раздарожаны.

Я паглядам дарагiм

Заварожаны.

(Прыпеў.)

Як падасць сваю руку

Мая суджана,

Велiчальную спяюць

На заручынах.

Замiлуецца душа,

Заспакоiцца.

Эх! Была ты не была,

Мая вольнiца!

(Прыпеў.)