Махляры палявалі за дарагiмi аўто

Источник материала:

Як паведамiў карэспандэнту "Звязды" начальнiк аддзялення iнфармацыi i грамадскiх сувязяў ГУУС Мiнгарвыканкама Аляксандр Ластоўскi, рэгiстравалiся падобныя факты ў Мiнску пазалетась i летась. Пасля праведзенага аналiзу iнфармацыi, схем i абставiнаў гэтых злачынстваў праваахоўнiкi прыйшлi да высновы, што размах, з якiм дзейнiчалi зламыснiкi, сведчыць: крымiнальным "бiзнэсам" займаецца арганiзаваная злачынная група. Каб яе выкрыць, з найбольш вопытных супрацоўнiкаў мiлiцыi была створана спецыяльная група, каардынацыя якой ажыццяўлялася крымiнальным вышукам ГУУС.

Дарагiя машыны ў пракатных фiрмах зламыснікі атрымлiвалi па падробных дакументах, i пасля дакументальнага афармлення i шчодрай перадаплаты пакiдалi тэрыторыю Беларусi на аўтамабiлях

Ужо ў Расii гэтыя аўто нелегальным чынам прадавалiся, i большасць з iх да гэтага часу так i не знойдзеныя.

Затое сталiчным правахоўнiкам удалося ўстанавiць асобы махляроў i затрымаць iх: як высветлiлася, да крадзяжу аўтамабiляў з пракатных салонаў мелi дачыненне трое расiйскiх грамадзян. На рахунку членаў гэтай групы як мiнiмум 15 фактаў падобных махлярстваў. Прычым, не выключана, не толькi ў Мiнску, але i ў iншых гарадах краiны. Што датычыцца пацярпелых аўтаўладальнiкаў, то пакуль пашанцавала толькi двум, машыны якiм у тэхнiчна спраўным стане ўжо вернутыя. У прыватнасцi, у Смаленску ў леташнiм лiстападзе быў знойдзены знiклы "Сiтраен С-5" 2007 года выпуску, а ў Мажайску крыху раней — аўтамабiль "Фольксваген-Каравэла" 2006 года выпуску. Пошук астатнiх аўтамабiляў працягваецца.

Як адзначыў Аляксандр Ластоўскi, падчас расследавання гэтай справы сталiчныя следчыя выйшлi на яшчэ адну злачынную групу, у склад якой уваходзяць таксама расiяне, якiя падазраюцца ў некалькiх аналагiчных злачынствах. Ужо выяўленыя асобы двух фiгурантаў апошняй групы, iнфармацыя пра якiх перададзеная расiйскiм праваахоўнiкам для арганiзацыi пошукавых мерапрыемстваў.