Ні ўлоўнiка, нi вугра

Источник материала:

У дачыненнi да адказных асобаў Нацыянальнага парку "Браслаўскiя азёры" ўзбуджаны крымiнальныя справы аб злоўжываннi службовымi паўнамоцтвамi.

Як паведамiў "Звяздзе" следчы па асаблiва важных справах следчага аддзела пракуратуры Вiцебскай вобласцi Мiкалай Хаткевiч, гэтыя службовыя асобы, выкарыстоўваючы свае службовыя паўнамоцтвы, у перыяд са жнiўня 2006-га па канец 2007 года, яўна ведаючы пра невыкананне ў поўным аб’ёме будаўнiчых работ на будаўнiцтве падпорнага збудавання з рыбаўлоўнiкам на рацэ Дрысвятка ў вёсцы Вусце Браслаўскага раёна, падпiсалi акты прыёму выкананых работ i пералiчылi грошы на адрас выканаўцы, чым прычынiлi страту парку на суму больш за 600 мiльёнаў рублёў.

Узбуджана крымiнальная справа i ў дачыненнi да галоўнага iнжынера раённага камунальнага ўнiтарнага прадпрыемства "Браслаўскае ўпраўленне капiтальнага будаўнiцтва", адказнага за вядзенне тэхнiчнага нагляду за будаўнiцтвам гэтага падпорнага збудавання. Ён, як высветлiлi следчыя, падпiсаў адпаведныя дакументы, таксама ведаючы пра тое, што фактычна аб’ект не пабудаваны.

Выяўлены i iншыя факты злоўжывання службовым становiшчам з боку генеральнага дырэктара нацыянальнага парку "Браслаўскiя азёры". Ён, дакладна ведаючы аб невыкананнi ўмоў дагавора аб праектаваннi спецыяльнага комплексу па вырошчваннi вугра, заключанага з адным лiтоўскiм прадпрыемствам, падпiсаў акт аб гатоўнасцi праектна-пошукавых работ i даў загад аб пералiчэннi фiнансавых сродкаў на суму амаль што 47 тысяч еўра. Гэтым прычынiў страту прадпрыемству ў асаблiва буйным памеры.

Акрамя гэтага, у мiнулым годзе з Лiтвы не была пастаўлена дамоўленая колькасць лiчынкi вугра коштам больш за 41 тысячу еўра для зарыблення рыбалоўных угоддзяў парку. Ведаючы пра гэта, генеральны дырэктар, нягледзячы на тое, што аплату трэба было правесцi пасля поўнай пастаўкi, даў распараджэнне галоўнаму бухгалтару i падпiсаў плацежныя дакументы на пералiчэнне ўсёй сумы на рахунак замежнага прадпрыемства.

У ходзе расследавання былi выяўлены i кiраўнiкi iншых арганiзацый, якiя таксама нанеслi фiнансавую страту Нацыянальнаму парку.