Пасля зімы журавiны смачныя, але танныя

Источник материала:

Патэлефанаваў старшынi Любашаўскага сельсавета Уладзiмiру Гардзею i пачуў:

— А журавiны ў нас i вясной збiраюць. Не так масава, як восенню, але iдуць на балота. Найперш тыя, хто не мае працы i хоча зарабiць нейкi рубель. Праўда, i цана за ягаду невысокая — крыху большая за дзве тысячы... Не сезон, хоць сваю якасць журавiны пасля зiмы i не страцiлi.

Лiчыцца, што калi ягада зiмой перамерзне, то становiцца смачнейшай — не такой кiслай i пры гэтым усе вiтамiны застаюцца ў журавiнах.

Але чаму за ягады плацяць не пяць тысяч, як у сезон, а толькi паўцаны?

Праблема тут са збытам. На рынку ў Баранавiчах можна журавiны паспрабаваць прадаць i па больш высокай цане. Даводзiлася бачыць, як з тым слоiкам ягад стаяць людзi (чамусьцi на вочы траплялiся найперш, мужчыны), але пакупнiкоў мала. Паназiраў нейкi час i не прыкмецiў, каб нехта журавiнамi пацiкавiўся.

Ды няхай чалавек i прадасць некалькi кiлаграмаў тых ягад на рынку, але, улiчваючы кошт бiлета з Ганцавiчаў да Баранавiчаў, прыбытку асаблiвага няма. Iншая справа — здаць журавiны нарыхтоўшчыку оптам: дзесяць кiлаграмаў прынёс з балота i атрымаў грошы. Цяганiны менш, а 20-25 тысяч рублёў — таксама заробак.

А як з журавiнамi ў мясцовым райспажыўтаварыстве?

Адказвае намеснiк старшынi па нарыхтоўках Аляксандр Ермаковiч:

Абзванiў усе перапрацоўчыя прадпрыемствы Беларусi, на многiх сам пабываў — журавiны там не патрэбныя. Ды i па вобласцi не прададзена спажыўкааперацыяй 250 тон журавiн. Крызiс даецца ў знакi i былыя пакупнiкi чакаюць.

Вось такая сiтуацыя. Выходзiць, калi прыватнiк плацiць дзве тысячы за кiлаграм, то па сённяшнiм часе — гэта добра.

Не ясна, як будзе iсцi нарыхтоўка ягад у сезон. Знойдуцца пакупнiкi на чарнiцы з журавiнамi цi нават па нiзкай цане яны не будуць нiкому патрэбныя?