Выселiцца. Каб засялiцца

Источник материала:

Кватэрнае пытанне

Парадак адсялення грамадзян на часовае жыхарства ў дом манеўранага фонду, асаблiвасцi выдзялення i карыстання жылымi памяшканнямi ў такiх дамах вызначаны Палажэннем аб спецыяльных жылых памяшканнях дзяржаўнага жыллёвага фонду (зацверджана пастановай Савета Мiнiстраў Рэспублiкi Беларусь ад 24 верасня 2008 года № 1408).

Перасяленне грамадзян i вяртанне ў адрамантаванае (рэканструяванае) жылое памяшканне ажыццяўляюцца за кошт сродкаў арганiзацыi, якая праводзiць капiтальны рамонт. Сродкi на перавозку маёмасцi наймальнiка (уласнiка) i членаў яго сям'i пры iх перасяленнi ў жылое памяшканне манеўранага фонду i пры iх вяртаннi ў адрамантаванае (рэканструяванае) жылое памяшканне ўключаюцца ў зводны каштарысны разлiк кошту капiтальнага рамонту або рэканструкцыi жылога дома.

Пад жылыя памяшканнi манеўранага фонду выкарыстоўваецца жыллё тыпавых спажывецкiх якасцяў, якое адпавядае санiтарным i тэхнiчным патрабаванням i знаходзiцца ў межах таго ж самага населенага пункта. Яны могуць быць па плошчы меншымi за жылыя памяшканнi, што займалiся да капiтальнага рамонту або рэканструкцыi жылога дома.

Карыстанне жылым памяшканнем манеўранага фонду ажыццяўляецца на падставе тэрмiновага дагавора найму (на час капiтальнага рамонту або рэканструкцыi дома), што заключаецца з арганiзацыяй, у гаспадарчым распараджэннi або аператыўным кiраваннi якой знаходзяцца жылыя памяшканнi манеўранага фонду.

У перыяд пражывання наймальнiка i членаў яго сям'i ў жылым памяшканнi манеўранага фонду ён уносiць плату за тэхнiчнае абслугоўванне жылога памяшкання i (або) карыстанне жылым памяшканнем, камунальныя паслугi i ажыццяўляе адлiчэннi на капiтальны рамонт жыллёвага фонду толькi за жылое памяшканне, якое выдзелена яму на час капiтальнага рамонту або рэканструкцыi жылога дома.

Пасля заканчэння капiтальнага рамонту або рэканструкцыi жылога дома, у якiм грамадзянiн i члены яго сям'i пражывалi, яны абавязаны вызвалiць жылое памяшканне манеўранага фонду. Пры адмове гэта робiцца ў судовым парадку.