У жнiўнi цэны павiнны знiжацца

Источник материала:

Цяпер у нашай краiне iснуюць эканамiчныя перадумовы для пэўнай дэфляцыi ў апошнiм месяцы лета, паведамiў учора журналiстам дырэктар дэпартамента цэнаснай палiтыкi Мiнiстэрства эканомiкi Беларусi Ігар Фамiн.

Паводле iнфармацыi спецыялiста, iнфляцыя за першае паўгоддзе склала 7,3 працэнта. Дынамiка росту iндэкса спажывецкiх цэнаў сёлета сведчыць аб замаруджваннi росту цэнаў i агульнай цэнавай стабiлiзацыi ў краiне. Калi ў студзенi ў краiне назiралася iнфляцыя ў памеры 4,1 %, то ў лютым — 1,1 %, у сакавiку — 0,6 %, красавiку — 0,4 %, у маi — 0,3 % i ў чэрвенi — 0,4 %. Ужо ў лiпенi пачалося знiжэнне цэнаў на крупы, таматы, агуркi, зелянiну i iншыя прадукты харчавання. Вытворцы ўсё часцей прапануюць iстотныя знiжкi на адзенне i абутак.

Кiраўнiк дэпартамента адзначыў, што паўгадавая iнфляцыя ў Расii i ва Украiне большая, чым у нашай краiне i роўная адпаведна 7,4 i 8,6 працэнта. Увогуле эксперты Мiнэканомiкi разлiчваюць, што iнфляцыя за другое паўгоддзе складзе ў нас каля 4 працэнтаў.

У пэўных СМI апошнiм часам пачала гуляць пагалоска пра тое, што спачатку ў жнiўнi, а потым i ў вераснi адбудзецца iстотнае павелiчэнне тарыфаў (кожны раз па 200 рублёў) на гарадскi транспарт.

Падобныя прапановы на гэты конт з боку сталiчных уладаў былi, аднак... Iгар Фамiн нагадаў пра тое, што такое павелiчэнне тарыфаў магчымае толькi пры рэалiзацыi адпаведных мераў сацыяльнай абароны насельнiцтва. У сувязi з тым, што пытанне аб павелiчэннi заробкаў i пенсiй не плануецца разглядаць раней за верасень, то i рост транспартных тарыфаў ажыццяўляць летам немэтазгодна. "Калi такое рашэнне i будзе, то, па нашым прагнозе, павелiчэнне транспартных тарыфаў не перавысiць 100-рублёвую мяжу", — сказаў Iгар Фамiн.

Спецыялiст Мiнэканомiкi запэўнiў журналiстаў у тым, што сёлета тарыфы на жыллёва-камунальныя паслугi павялiчвацца не будуць. Змяненне гэтых тарыфаў запланавана ажыццявiць з першых дзён наступнага года.

Iгар Фамiн нагадаў аб правядзеннi мерапрыемстваў па лiбералiзацыi цэнаў. Так, з 1 лiпеня пастановай Саўмiна было адменена рэгуляванне цэнаў i тарыфаў на асобныя сацыяльна-значныя паслугi. Гэта паслугi пральняў, хiмчыстак i цырульняў. Да чаго гэта прывяло? Цяпер у Мiнску тарыфы на паслугi хiмчыстак павялiчылiся ажно да 50 працэнтаў. Далейшая лiбералiзацыя цэнаў будзе ажыццяўляцца з улiкам сацыяльна-эканамiчнай сiтуацыi ў краiне, а таксама залежыць i ад развiцця падзей на знешнiх рынках, лiчыць спецыялiст Мiнэканомiкi.